Ekhuluma ekuqaliseni komhlangano wenkokheli yamazwe womhlaba, owe United Nations General Assembly, uMongameli Joe Biden wele Melika ukhuthaze abanye bakhe ukuthi batshiyane lomkhuba wombuso woncindezelo.
Wapha umzekeliso wele Zambia esithi ngelinye lamazwe enelise ukulwisana lenkohlakalo aletha inguquko.
Embikweni wakhe eUNGA, uBiden ukhulume kabanzi ngombuso wentando kazulu, esithi umbuso woncindezelo awusoze waphumelela ngoba bekhona abazimisele ukuwukhankasela lanxa impilo zabo zisengozini.
“Umbuso wentando kayiphikiswa ungemukelwa ngabanye abantu becabanga ukuthi unganqoba embusweni wentando kazulu, kodwa bayazikhohlisa abantu abacabanga njalo. Umbuso wentando kazulu okhululekileyo, ulabantu abanengi abawuvikelayo emhlabeni jikelele. Uqhuqhuzelwa ngabalwisana lenkohlakalo, abakhuthaza ukulondolozwa kwelungelo loluntu, intathelizindaba, abakhuthaza ukuthula. Abakhokhelayo kule impi yokulondolozwa kombuso okhululekileyo wentando kazulu ngabantu base Belarus, Burma, Syria, Cuba, Venezuela, abesifazana base Sudan abalesibindi sokumelana lombuso woncindezelo, kwele Moldavia, kwabasakhulayo base Zambia abenelise ukuqoqana bavota ngobunengi baguqula umbuso walelo lizwe bemelana lenkohlakalo loncindezelo. Akula mbuso okhululekileyo ongabhekani lobunzima, okugoqela lakhonapha emelika esibhekane lodlakela lezinye inhlupho kodwa siyakwazi ukuthi umbuso wentando kazulu okhululekileyo yiso kuphela isikhali esingahloma ngaso ukuwulondoloza,” kutsho uMongameli Biden.
Your browser doesn’t support HTML5
Amazwi kaMongameli Joe Biden weMelika emhlanganweni oweUnited Nations General Assembly