Kudaba lweziphathelane lesimo sezombusazwe eZimbabwe esilethulela lona nsukuzonke, ngoMvulo sixoxe loProfessor. Welshman Ncube okhokhela elinye icele lebandla leMDC.
UNcube uthe akuncedi ukubambana lamanye amabandla ikakhulu nxa etshiyana imbono yezombusazwe kanye lamacebo okulungisa umnotho welizwe osobhidlike okumangalisayo.
UProf. Ncube uthe, “Indaba zama coalition lezi ukuphongukukhuluma ngazo kungekho ezingathi yinofi eletha abantu ukuthi babendawonye ngaphandle kokukhipha (umongameli Robert) uMugabe empusweni ngibonukuthi kuzasihlupha ngoba ukuphonguhlanganisa konke kufana lokuphek’isithswala sempuphu lenhlabathi uthi uzasidla. Uyabe ungasoze usidle.
“Into eqakathekileyo yikuthi lawo amabandla akholwa izinto ezifananayo kababambane basebenze bonke.”
Ephundula umbuzo wokuthi amabandla abusayo kawasoze anqobe ibandla leZanu PF nxa engamaqamuqamu, uProf. Ncube uthe uzulu kumele akhethe umuntu amfunayo ngakho-ke amabandla wonke la amele lokho abakufunayo okungathandwa nguzulu.
Uthe uzulu ulakho lokukhetha uMongameli Robert Mugabe nxa ekholwa yilokho okwenziwa libandla leZanu PF.
Kwezomnotho uProf. Ncube uthe, “Umnotho welizwe lo ulele phansi ngesisu ugcwele inhlabathi.”
Uthe kumele uguqulwe lukhetho lapho abantu makhaza okumele bavotele inkokheli ezinganiki uzulu inhlanyelo kumbe amalambi omlili wama battery kodwa abantu kuzwa.
Uthe umnotho uzahlala uzinjobo ngenxa yokwenzakala elizweni lapho abantu abaphiwe lokhu la lokhuya ukwenzela ukuthi bavotele amanye amabandla.
Ugqibe ingxoxo ngokuthi sokumele uzulu ayekele ukuvotela idonki efileyo. “Asivuleni amehlo sihlakaniphe. Nxa ucabanga ukuthi uzakuya esigayweni uthwele isaka lakho emhlani wedonki efileyo edliwa zimpethu sizahlala sikhonapha lapha esikhona.”
Ukuze lizwe okunengi ngodaba lolu hambani kubulembu beInternet ku – www.voandebele.com. Sizaphinda njalo www.voandebele.com.
Your browser doesn’t support HTML5
Ingxoxo Esiyenze LoProfessor Welshman Ncube
Kudaba olufanayo ngoLwesibili sizabe sixoxa loNkosikazi Beauty Nyambosi Kerr, umsekeli kaElton Mangoma okhokhela ibandla le Renewal Democrats of Zimbabwe.
Your browser doesn’t support HTML5
UNkosikazi Beauty Nyambosi Kerr
Lingakhuthwa yile ingxoxo le ngoLwesibili emsakazweni weStudio 7. Abadala bathi ukutshelwa yikuncitshwa.