Umkhankaso wokulimukisana ngemvukuzane yebele uqhubekela phambili emhlabeni wonke jikelele kodwa lonyaka inhlanganiso eziqhuba lumsebenzi azizwakali ukukhankasa kwazo okuyinto edanisa abanengi abalawo kumbe abadinga ulwazi lolu.
Ulwazi ngemvukuzane yebele luqakathekile kakhulu ngoba lulakho ukuphathisa ekuphephiseni uzulu ekulahlekelweni ngumphefumulo.
USister Ndlovu, okhangele abongi bonke emzini owe Island Hospice and Healthcare koBulawayo, uthi kunzima ukuzivikela kumkhuhlane wemvukuzane.
“Ukuvikela kwalumkhuhlane owemvukuzane eyebele kunzima ngoba isikhathi esinengi itholakala ngosendo, so kuhle ukuthi abantu benanzelele ukuthi emulini ukhona umkhuhlane wemvukuzane so beqale ukuhlala bezihlola. Siyakhuthaza njalo ukuthi abantu behlale besidla ukudla okuqondileyo okule protein eyanele, le starch esaneleyo ukuze bevikele lumkhuhlane owemvukuzane.”
USister Ndlovu uthi kulendlela ezehlukeneyo ezigoqela ukuhlinzwa kanye lamajekiseni ehlukeneyo ahlatshwa inyanga eziyisikhombisa kusiya kweziyisitshiya ngalo lunye.
“Nxa isitholakele imvukuzane odokotela bayathatha inyama encinyane kuhlolisiswe ukuthi yiCancer yini. Nxa kuyiCancer bayasika ibele bebe sebekufaka emtshineni okuthiwa yikutshiswa iRadiation ukuba kubulale amaCancer cells ayabe esemzimbeni. Imithi le okuthiwa yiChemotherapy iyabiza yikho uhulumende engasiniki abantu bayazithengela.”
Bakhona abantu abaphila lalabo ababanjwe umkhuhlane lo.
Omunye wabo nguNkosikazi Sithembiso Nyathi, isakhamuzi sako Bulawayo oloninazala owabanjwa limvukuzane.
“Umamazala wabanjwa iCancer ngo2015 wabhubha ngo2016. Phakathi kweminyaka le embili leyi sahlangana lobunzima obukhulu. Wahlolwa lapha eZimbabwe kwathiwa akulalutho, waya eSouth Africa kwathiwa yiCancer. Saphenduka saya eMatei Dei, kwathiwa uyenziwa iChemotherapy kuphela. Kodwa asilubonanga uncedo lwayo. Uyahamba eMpilo kumbe eUBH bakukhangele amaLumps, kodwa nxa sekufika ekwelatshweni kusuka kuswelakale.
Ingcwethi zempilakahle zithi inani lababanjwa yilumkhuhlane liyaqonga eZimbabwe mhlawumbe kubangelwa yimpilo yalamhlanje elokudla okucolekileyo kwadlulisa.
Your browser doesn’t support HTML5
Ukucebisana Ngomkhuhlane Wemvukuzane