Inengi labaphila ngokuthengisa ezitaladini eHarare lithi amapholisa kamanisipala walelidolobho ayababhadalisa imali ngokungekho emthethweni ukwenzela ukuthi engababophi njalo engabathatheli impahla zabo nxa bethengisela lapho abangela mvumo khona.
Isiphathamandla senhlanganiso elwela amalungelo abathengisayo eye National Vendors Union of Zimbabwe uMnu. Stan Zvorwadza uthi amapholisa la avikelwa yiziphathamandla zekhansili engamangalelwa.
Kodwa isikhulumeli sekhansili ye Harare uMnu. Michael Chideteme ulandule ukuthi amapholisa kaminisipala ayakwenza lokhu njalo iStudio 7 ayenelisanga ukukhuluma lamapholisa ngaloludaba.
Abanye abathengisa ezitaladini abakhulume leStudio 7 bathi lokhu kubabuyisela emuva ngoba bacina bengelamali yoku selela imuli zabo, ngisikhathi umnotho welizwe ubhidlika lemisebenzi ingatholakali.
Lokhu kwenzakala abathengisa ezitaladini bekhonona ngokuthi indawo ezintsha zokuthengisela azifanelanga lumsebenzi ngoba zikhatshana kakhulu ledolobho.
UNkosazana Debra Mukasa, isiphathamandla senhlanganiso elwela amalungelo abaphila ngokuthengisa ezitaladini eye Zimbabwe Chamber of Informal Economies Associations uthi okuhluphayo kakhulu yikuthi eHarare kulenhlanganiso ezinengi njalo ezinye yizo ezifuna ukubhadala amapholisa ukuthi zisebenze kuhle.
Your browser doesn’t support HTML5
Ingxoxo LoNkosazana Debra Mukasa