Izakhamizi zeMberengwa kanye lendawo zezansi yeMaNdebeleni sezikhuthaze uhulumende ukuthi agcwalise izithembiso azenza ekhankasela usekelo kukhetho, zokubapha imvumo yokwemba igolide bengahlukuluzwa ngampholisa ngoba le yiyo yodwa indlela abasele layo ukuzama ukuziphilisa.
Kuphathwa ukhetho luka2013, ibandla leZanu PF lathembisa ukuguqula imithetho ephathelane lezokwemba ukuze abemba igolide benelise ukwenza lokhu bengaphazanyiswa yimithetho eyabekwa kudala kusagcwele amankampani amakhulu.
Umthetho okhona oweMines and Minerals Act osebenzayo okwamanje ubikwa ungalawuli ukuthi abemba bebodwa baphathwe njani okwenza bacine behlawuliswa imithelo efana leyamankampani amakhulu, okuyikho okwenza baqhubeke besebenza okungekho emthethweni.
Osakhulayo, uMnumzana Sydney Ncube ogebha emigodini yeGwanda uthi amapholisa abathwalisa amagabha avuzayo ngoba ayababopha kumbe ababhadalise ngudlu lapho bengela maphepha afaneleyo okugebha avele ehlupha ukuwathola.
Uthi bangabe belesifiso sokugebha okusemthethweni kodwa imali zakhona azibavumeli, ukuthi bekele akuvumi ngoba bangafa yindlala njalo uthi bavunyelwa ngumkamongameli ukuthi bagebhe ngesikhathii kukhankaswa.
UNkosikazi Mutsai Mhlanga, owakoYoko esiqintini seMberengwa, uthi ukugebha igolide sokwaguqula impilo zabantu abanengi abasebebangwa lezibi ngobuyanga bengazi ukuthi bangaphila ngani.
Bayazwisisa ukuthi ukugebha kwabo amatshe aligugu kubulala umhlabathi kungakho uthi kudingeka ukuthi baphathiswe ngemfundiso yokugebha ngendlela ezalondoloza imvelo.
Labo uthi bayayibona indawo yabo ukuthi isigcwele indonga indawana yonke kodwa ukuthi bame akuphathisi ngoba bangafelwa ngabantwana.
Isakhamuzi, uMnumzana Japhet Gumbo oweGwanda laye, uthi yena udubo alubonayo endaweni yabo yikuthi inengi labantu elemba kulindawo alizalwa lapha kungakho liyathatha imali lisiya thuthukisa indawo elivela kuzo bona basale bebambe insiba nje.
Kodwa uthi liqiniso sibili ukuthi kungela kugebha lokhu aluba impilo inzima ngamandla ngoba ingcosana yonaleyo abayitholayo iyabanceda ikakhulu lonyaka lapho isigaba sibhekane lendlala ngemva kokuswelakala kwesivuno esibambekayo, uhulumende laye akwaziyo.
Kucatshangelwa ukuthi abemba igolide okungekho emethethweni, abaziwa ngokuthi ngomakorokoza, bafika ingxenye yesigidi elizweni – 500,000.
Ingcitshi zithi lapho kugebha ingxenye yesigidi elizweni okungekho emthethweni, inzuzo yabo igcina abantu isigidi lengxenye – 1.5 million lapho sokukhangelwa imuli zabo kanye labosomabhizimisi abaphila ngemali yalababantu kungakho akulungiswe imithetho ebavumela ukugebha hatshi ukuthi baqhubeke behlukuluzwa ngamapholisa.
Abagebhayo laba babhekane lenhlupho ezithile ezigoqela ukuswela imitshina edingakalayo eyenza umsebenzi ubelula, izembatho zokuzivikela kanye lokuswela abathenga amatshe abo ngentengo eyiyo, phezu kokuhlutshwa ngamapholisa.
Kubikwa emaphandleni khona, amatshumi ayisikhombisa ekhulwini – 70% liphila ngakho lokhu kugebha amatshe aligugu, ikakhulu igolide le chromite.