UMongameli Jacob Zuma weSouth Africa, uthi sebumbe iqula azalithuma eZimbabwe ukuyabona ukuthi inkulumo phakathi kwamacele womabili eMDC leZanu PF zihamba njani.
Embikweni awethule ngolweSithathu, uZuma wazise ukuthi iqula leli, lona elilabantu abathathu, lizakhokhelwa ngomunye wabacebisi bakhe, uMnu Charles Ngqakula.
Laloba uZuma engacacanga embikweni wakhe ukuthi iqula leli lizahamba nini eHarare, imbiko esiyamukeleyo iveza ukuthi lilakho ukuhamba ngolweSihlanu kumbe ngoMgqibelo.
Inkulumo phakathi kweZanu PF leMDC ziqale ngoMvulo njalo ziyaqhubeka laloba kubikwa kulokudonselana okukhulu. IZanu PF ibikwa iqina ngokuthi nxa iMDC ifuna kulungisiswe okuhluphayo, kumele ivale imisakazo efana leStudio 7 kuqala njalo itshele amazwe afana leMelika ukuthi esule izijeziso.
UMongameli Zuma uphiwe umlandu yiSadc Troika emhlanganweni oqhutshelwe eMozambique mhlaka 5 kuyonale inyanga ukuthi eqonqosele ukukhulumisana phakathi kwamabandla la kulungisiswe okuhluphayo kuhulumende womanyano ngokuphangisa.
Isikhulumeli sikaZuma uMnu Vincent Magwenya utshele iStudio 7 ukuthi iqula leli lingaqeda inhlolisiso yalo, uZuma ngokwakhe uzakwazisa inkokheli yeSadc Troika ngelikufumeneyo.
Ingcwethi ecubungula ezombusazwe uMnumzana George Mkhwanazi utshele uNtungamili Nkomo weStudio 7 ukuthi ukuthumela iqula eHarare okwenziwe nguMongameli Zuma kuveza ukuthi uzimisele ukubona udaba lweZimbabwe lulungisiswa.