Ukuqonga kwenani lasebefunyenwe beleCOVID-19 koBulawayo, sekutshiye inengi kulelodolobho likhathazekile kakhulu. Umbiko owethulwe ngabogatsha lwezempilakahle, ngokutshona kwelanga NgoLwesibili, uveza ukuba koBulawayo sekulenkulungwane eyodwa lamakhulu edlula amathathu-1,314, abantu asebefunyenwe belecovid 19, selibulele abangamatshumi amane lambili-42.
Ingcwethi kwezempilakahle, zithi leli nani lizaqhubeka liqansa ngoba abantu abakaguquli ukuziphatha kwabo, ekuzivikeleni ukuthelelanwa lula kwalumkhuhlane.
Eyinye yalezi ngcwethi, uMnu. Effie Dlela Ncube, owenhlanganiso ye Citizens COVID-19 Monitoring Mechanism, eqhuba inhlelo zemfundiso ngokuphathelane laleli gcikwane uthi okukhathazayo yikuthi abantu abakaguquli ukuziphatha kwabo kungkhathalekile ukuthi bayaluthola na, ulwazi oluphathelane lokuzivikela ukuthelelwa leligciwane, yikho okwenza ukuthi Icovid-19 imemetheke okwethusayo elizweni, okugoqela koBulawayo.
UMn.Effie Dlela Ncube
“Abantu balutholile ulwazi, kodwa abaguqulanga ukuphila kwabo. Ungakhangela indawo ezitshiyeneyo koBulawayo, akula social distancing, abantu kabenzi konke okudingakalayo ukuzikela kulumkhuhlane.Ngokunjalo ke, igciwane lizaqhubekela phambili limemetheka, ligcwala ilizwe lonke,” kutsho uNcube.
Edabeni lwezikolo ezivulwa ngeviki ezayo, uNcube uthi, yebo izikolo kumele zivulwe, kodwa uhulumende kumele ananzelele ukuthi ulomthwalo omkhulu wokuvikela ababalisi kanye labafundi ezikolo.
“Izikolo kumele zivulwe ngoba kuqhakathekile ukuthi impilo yabantwana iye phambili. Umlandu omkhulu ngowokuthi kuvikelwe abantwana, ababalisi kanye labazali. Abazali labo balomsebenzi omkhulu wokuthi bavikele abafundi lababalisi, ngoba bangathelela umntwana, umntwana uzathelela ababalisi. So sonke silumlandu wokuthi sibone ukuthi igciwane leli kalifiki esikolo,” kutsho uNcube.
Your browser doesn’t support HTML5
Ingxoxo esiyenze lo Effie Dlela Ncube
Kunjalo nje, asebetholakele beleCovid 19, eZimbabwe yonke jikelele, sebezinkulungwane ezedlula eziyisikhombisa-7,388. Abazinkulungwane ezedlula ezinhlanu-5,477, babo babikwa sebesinde kuleligcikwane eselibulele abantu abedlula amakhulu amabili-218.
Emazweni awezwekazi leAfrica asebebanjwe belegcikwane leli, sebedlula isigidi – 1,306,157, labulala inkulungwane ezingamatshumi edlula amathathu- 31,494.
Abekholitshini leJohns Hopkins University yakwele Melika, bona bathi emhlabeni jikelele sebeyizigidi ezingamatshumi edlula amabili lasikhombisa- 27,368,676 , abafunyenwe beleCovid 19, yabulala abantu phose isigidi esisodwa- 893,313.