Izizalwane zeZimbabwe ziveza imibono ehlukile ngelanga lokunanza isivumelwano seUnity Accord esalotshwa ngomnyaka ka1987 bethi bananza leli langa ngobuhlungu bezinga laphezulu lonyaka phansi kombuso kaMongameli Emmerson Mnangagwa ngasikhathi sinye zimelana lobhubhano lweCovid-19.
Osakhulayo wakoBulawayo uMichael Ndiweni uthi iUnity Day lilanga elibuhlungu empilweni zabanengi.
“Ngapha emhlubulweni weMaNdebeleni lapho umbhuqazwe weGukurahundi owathanyela khona bekhalaza ngokuthi uma kufika lelilanga bezwa ubuhlungu makungabi lilanga lokuthokoza kodwa elesikhumbuzo bekhala bekhumbula abatshonayo. Abadala abasinda kumbhuqazwe bathi bezwa ubuhlungu uma bebona abantu begida ngabe kuyalungiswa abantu bakhale kungene kumbali libeyisikhumbuzo lakulabo abazathi bazalwe kumele bazi ukuba kwabalombhuqazwe ezweni.”
Olwela amalungelo oluntu, uMnu Mbuso Fuzwayo uthi kulusizi ngoba umbuso okhona manje uyenga abantu.
“Osekuluhlupho yikuthi uyathi ulungisa udaba lombhuqazwe kodwa okuyikho akulanto ebambekayo kuqilwa abasinda kumbhuqazwe. Ngabe eqotho ngabe uthi ilanga leUnity Day laziwe ngokuyikho okwenzakalayo hatshi indlela okwenzakala ngayo manje ezweni uma kulungiswa udaba olwenza kwaba leUnity Accord.”
Omunye njalo olwela amalungelo oluntu, uMnu Effie Ncube uthi iUnity Day ayila okuhle emkhumbuza ngakho.
“Abantu bancindezelwe ezweni bafuna ukudla, impuphu, ukuba uncindezelo luphele bafuna ukhetho olukhululekileyo. Abantu iUA ayikho mqoka kibo bafuna ukudla, amalungelo oluntu ahloniswe, uzibuse oqotho Kanye lokuhlala kuhle ezweni.”
Owasila kumbhuqazwe weGukurahundi eyadala iUA uNkosikazi Thokozile Mpofu uthi kuyize konke okwenziwa nguhulumende uma bona abasindayo bengaphatheki kunhlelo zokukhumisana umlotha.
“Kumele silikhumbule uma siphatheka kulezonhlelo sasinda kodwa sesiyizilima njalo kungaba yiziphi inhlelo abazenzayo eziphathelene lombhuqazwe kumele kube yithi esiphathekayo, esizikhulmelayo esiphathekayo ngokulimala kwethu sibemqoka nothing without us for us. Sicela ukuba uhulumende aze kulabantu abaphathekayo hatshi umuntu nje akukhokhele abantu abaphuma eMaNdebeleni abalungisa loludaba.”
Osakhulayo WakoBulawayo uThndanani Mnkandla uthi lilanga elibuhlungu ngoba walahlekelwa yizihlobo.
“Leli lilanga elibuhlungu kakhulu ngoba salahlekelwa yizihlobo zethu ezinengi ngesikhathi sombhuqazwe weGukurahundi, lilanga elingatshiphanga kumele sithathe inyathela njengabantu beMaNdebeleni ukuba sikulungisise lokhu ngoba kuyisiga esinzima njalo esibuhlungu.”
IZimbabwe inanze iUnity Day ngoLwesibili kodwa abantu beNkabazwe leMaNdebeleni besithi likhefu nje elingatsho lutho kubo, belokudana okukhulu ngoba ngaphandle kokumisa ukubulawa kwabantu mahlayana akula okuhle okuthe kwalethelwa uzulu kulumhlubulo, kulokuncindezelwa njalo kungela ntuthuko nxa kuqathaniswa lezinye izigaba zelizwe.
Inengi Labantu bathi abakukhalelayo yikuthi abakuhulumende bavume ukuthi kwenziwa iphutha njalo baxolise njalo kube lenhlelo ezilesithunzi zokunanza labo ababulawa ngesihluku kuGukurahundi.
Umongameli Emmerson Mnangagwa wethule amazwi wokunanza lolusuku lapho akhuthaze uzulu waseZimbabwe ukuthi alondoloze iziqondiso zokuthula zesivumelwano seUnity Accord.
Your browser doesn’t support HTML5
Udaba lwemibono yabantu ngelanga leUnity Day siluphiwa nguAnnahstacia Ndlovu