Abezemfundo lozulu wakoBulawayo baqhubeke bekhalela immuli yakoHikwa ngoMvulo ngokubhubha kukaMnu Lawton Hikwa, yena obefundisa ekolishini leNational University of Science and Technology.
UHikwa ubhubhele esibhedlela ngeSonto ngemva kokukhala ngokungaphefumuli kuhle.
Uke waloba ekhasini lakhe leFacebook ngoLwesine ecela abangane bakhe ukuthi bamkhulekele ngoba engezwa kuhle.
UHikwa utshiye uNkosikazi wakhe uDidekile, labantwana abathathu. Abantu babuthene endlini yakhe eMorningside koBulawayo. UMzimba wakhe ubikwa uzatshiswa.
Isiphathamandla esibona ngokwethulwa kwemibiko eNust uMnu Felix Moyo yena uthi njengekolitshi balahlekelwe okwamagama ngoba umuyi ubengumuntu wabantu njalo engokhutheleyo.
"Silahlekelwe ngumuntu obengumfowethu, umuntu okade esazi umsebenzi wakhe njalo ewuthanda. Ubengumuntu oqhuba umsebenzi wakhe engafuqwa muntu," kutsho uMoyo.
Your browser doesn’t support HTML5
Ingxoxo lomnumzana Felix Moyo
Kunjalo nje, amalunga eMDC-T lozulu sebesole inkokheli yalelibandla egoqela uMnu Morgan Tsvangirai ngokwehluleka ukuya emngcwabeni kaMnu Thamsanqa Mahlangu.
UMnu Mahlangu ubengummeli weNkulumane edale lephalamende njalo ubengumsekeli kamabhalane obona ngokuqoqwa kwenhlelo zalelibandla.
UMahlangu ungcwatshwe ngoMgqibelo kulokulwisana phakathi kwemuli yakhe.
Lanxa uTsvangirai ebehambile koBulawayo kasahambanga lobukhokheli bonke baleli bandla ukuyangcwaba uMahlangu besithi besaba udlakela obelukhona phakathi kwemuli.
UMnu Nelson Chamisa ngomunye wamalunga eMDC-T amalutshwana ahambileyo.
Amanye amalunga ebandla esingeke sawaveza amagama awo ayamsola kakhulu uTsvangirai esithi wenze ihlazo kanye leziphathamandla zakhe.
Kodwa umqoqi wenhlelo zalelibandla uMnu Abednico Bhebhe uthi bebengafuni ukungenela empini yemmuli yakoMahlangu.
"Angiboni ukuthi bekuqondile ukuthi umkhokheli webandla elinjenge MDC elihloniphekyo aye lapho okulwelwa khona isidumbu," kutsho uBhebhe.
Your browser doesn’t support HTML5
Ingxoxo loMn Abednigo Bhebhe