Ugatsha olubona ngokuvikelwa kwemvelo eMelika olweEnvironmental Protection Agency luzakuba lomkhokheli omutsha maduze kulandela ukukhethwa kowake waba lilunga lePhalamende uLee Zeldin ngosezakuba nguMongameli uMnu Donald Trump.
Intathelizindaba yeVOA News uVeronica Balderas Iglesias ulobe udaba olulandelayo ekhangela ukuthi ungubani kahle-kahle uZeldin lokuthu udaba lokuguquka komkhathi ulakho ukuluphatha njani.
ULee Zeldin waba lilunga lePhalamende okwamahlandla amane Emele idolobho leNew York, futhi ungumsekeli kaDonald Trump okwesikhathi eside. UZeldin usekhangelelwe ukuba ngumholi weU.S. Environmental Protection Agency.
Lumlisa uleminyaka yokuzalwa engamatshumi amane lane, 44, njalo wafundela ubugqwetha eAlbany Law School. Waba libutho njalo okweminyaka emine futhi uyindoda ethetheyo elabantwana abangamawele.
Kumbiko awethule mhlaka 11 ngoLwezi, uTrump wazise ngokukhetha kwakhe uZeldin, esithi uzasebenzisa ukuciko bakhe ukudlondlobalisa ezamabhizimusi aseMelika njalo ezilandela izimiso zokulondoloza ezemvelo.
UZeldin utshele umsakazo weFox News ukuthi uzaqhuba inhlelo zikaTrump eziphathelane lomnotho ngokugcweleyo.
Uthe, "Kulemithetho egqugquzelwa ngabasesandleni sokhohlo kwezombusazwe ephambanisa inhlelo zamabhisimusi.”
Phansi kombuso kaMongameli Joe Biden, ugatsha lweEPA luqakathekise ukusetshenziswa kwamandla kagetsi angelakho ukuphambanisa imvelo futhi angapheliyo, i-renewable energy, lwafaka imigoqo elawula ukukhiqizwa kwamafutha e-oil legas, ngenjongo yokuvikela umkhathi.
"Sizayikhipha yonke imigoqo sivumele ukugejwa kwamafutha, kwakhiwe impompi zokuwahambisa kanje lamafekithali okuwahlambulula,” kutsho uTrump. “Sizakwakha lamafekithali alungisa izimota ezihamba ngogetsi.”
UZeldin wethule amazwe afanayo eze encintise esikhundleni zokuba ngusibalukhulu weNew York ngo2022.
“Kumele sesule umthetho ovimba ukugejwa kwe-gas njalo sisungule impompi ezintsha ezihambisa amafutha,” kutsho uZeldin.
Ukukhethwa kwakhe kuza ngesikhathi umanyano weUnited Nation ugcizelela isikhalazo sawo sokuthi amazwe omhlaba etshiyane lokusebenzisa izinto zokubasa ezenjiwayo, ama-fossil fuels, ukuze kumiswe ukuguquka komkhathi.
Unobhala jikelele weUnited Nations uMnu Antonio Guterres uthe, "Umsindo eliwuzwayo yikukhala kwenkombalanga. Sisezingeni lokucina ukuba sinqabe ukukhudumala komkhathi kube ku-1.5 degrees Celsius, futhi sesitshiywe yisikhathi."
Lanxa imithetho ephathelane lokuguquka komkhathi ikhangelelwe ukwesulwa nguhulumende phansi kobukhokheli bukaZeldin, ingcwethi zithi okwakhathesi, izabelo zilakho ukwethula imithetho yazo zizimele futhi labantu balakho ukuzikhethela inhlelo ezilondoloza umkhathi.
Your browser doesn’t support HTML5
Udaba Siluphiwa nguNtungamili Nkomo weStudio 7
Udaba lolu lulotshwe nguVeronica Balderas Iglesias, oweVOA News lwahumutshwa yim iuNtungamili Nkomo weVOA Studio 7.