Amazwi kaMongameli Robert Mugabe awokuthi uhulumende uphakathi kokuqoqa umthetho wokulwisana lokungethembeki amukelwe ngenjabulo ngabanengi lanxa nje besola ukuthi ngempela kuzakwenzakala lokhu.
Emazwini akhe ethulwe edale lephalamende ngoLwesithathu ngumsekeli wakhe uMnu Emmerson Mnangagwa, uMugabe uthe umthetho lo uzabamba ngamandla iziphathamandla zikahulumende ukuthi ziveze inotho yazo ekuqatshweni kwazo.
Uthi lokhu kuzakwenza kube lula ukuthi zibanjwe iziphathamandla lezi nxa zithe zantshontsha zatshaphaza imali kahulumende ngoba kuzabonakala zezilenotho ebezingelayo ekuqatshweni kwazo.
Ukungethembeki yisifo esesihluphayo kakhulu elizweni njalo iziphathamandla zikahulumende ezeheswa lelicala zighoqela abaphathintambo, amakhansila, amapholisa lezinye izisebenzi zikahulumende.
Ukuhlaziya loludaba sixhume ingcwethi kwezenotho uMnu Masimba Kuchera lengcwethi kwezombusazwe uMnu Nkululeko Sibanda.
"Into azikhulumileyo sowake wazikhuluma. Indaba yokulwisana le-corruption sowake wayikhuluma kodwa akulalutho osolwenzakele," kutsho uKuchera.
USibanda uvumelane loKuchera esithi amazwi kaMugabe la engaba eyindlela nje yokudinga usekelo ebantwini ngaphambilini kokhetho luka2018.
Your browser doesn’t support HTML5
Ingxoxo loMnu Masimba Kuchera loMnu Nkululeko Sibanda