Kusiyafika ngeSonto kusihlwa umkhuhlane wohudo ubusubulele abantu abangamatshumi ayisikhombisa lanye - 71 njalo uyamemetheka okwethusayo eZimbabwe.
Ngesikhathi esifanayo, kulabanye abedlula amakhulu amathathu lanhlanu - 359 abacatshangelwa ukuba babulewe ngumkhuhlane lo omemetheka elizweni. Ingcwethi kwezempilakahle zithi kunengi okumele kwenziwe ukuze kwenqabelwe umkhuhlane lo.
Inhlanganiso ebona ngezempilakahle emhlabeni wonke jikelele eyeWorld Health Organization isanda kunika eleZimbabwe imithi lokunye okokwenqabela ukumemetheka komkhuhlane lo osugulise abantu abafika inkulungwane ezingamatshumi amabili lengxenye – 19,649 selokhu waqhamuka nyakenye ngoNhlolanja.
Ekuzameni ukwenqabela umkhuhlane wohudo elizweni, I-W-H-O ithi ibambisane lenhlanganiso ezigoqela eyeHealth Resilience Fund, The Vaccine Alliance, Gavi kanye leEuropean Union. Embassy of Ireland, UK Aid lezinye.
Ithi uncedo lolu luzakwenza eleZimbabwe lizame ukucenga amanzi ahloliweyo, ukulolonga abongi abazakuba lolwazi olujiluleyo ngomkhuhlane wohudo lokunye okufunakalayo.
Embikweni abasanda kuwethula, inhlanganiso le iphinde yathi eleZimbabwe lizancedwa ukwenza imikhankaso yokukhulumisana lozulu ngomkhuhlane wohudo. Ingcwethi kwezempilakahle zincoma okwenziwe yinhlanganiso le zisithi kumele uzulu lohulumende benze okunengi ukuze ungamemetheki ngamandla umkhuhlane wohudo. USikhwicamfundo Solwayo Ngwenya osebenza eMpilo Hospital okhuluma ezimele uthi kunengi okungenziwa ukuze kwenqatshelwe umkhuhlane lo.
USikhwicamfundo Ngwenya uthi kuqakathekile ukuyabona odokotela masinyane uma kucatshangelwa ukuthi umuntu ulesifo sesihudo.
Umemetheka ngamandla umkhuhlane lo eHarare osokubhubhe abantu Manicaland, Matabeleland North, Masvingo, Mashonaland Central leHarare. Kulabantu abafika amatshumi amane – 41 abasanda kubanjwa ngumkhuhlane lo eMashonaland Central okuyisabelo esikhokhela ngenani labathaphe umkhuhlane lo kusiyafika izolo. UMnu. Marvellous Khumalo okunhlanganiso yeCombined Harare Residents’ Trust uthi kumele abantu beqhaphele umkhuhlane lo.
Uthi bathola ulwazi kwabezempilakahle mayelane lomkhuhlane wohudo.
KoBulawayo kukhanya engani balwisana kahle lomkhuhlane lo okulomuntu oyedwa osanda kuhlolwa watholakala eligciwane lohudo. UMnu. Thembelani Dube umabhalani obona ngokudlelana lezakhamizi kunhlanganiso yeBulawayo Progressive Residents’ Association uncoma okwenziwa yikhansili.
UDube uxywayisa uzulu ukuba aqaphele umkhuhlane lo.
Uhulumende uthi ulwisana ngamandla lomkhuhlane lo njalo ukhuthaza abantu ukuba belandele abakutshelwa ngabezempilakahle.
SEE ALSO:
Udaba Esilwethulelwe NguGibbs Dube