Ukuswelakala kwamanzi ayeneleyo, ukudubuka kwezitishi zempompi ezithwala ingcekeza lokungahlanzeki kwamanye amadolobho kubikwa kuyikho okubangela ukumemetheka kwemikhuhlane yesihudo, njenge eCholera kweleZimbabwe.
Ugatsha lwezempilakahle lukhiphe umbiko othi kuthange kutholekale abantu abangamatshumi ayisikhombisa lanye -71 beleCholera, wabulala oyedwa.
Ugogo uMagumede ohlala emzini weTshabalala, ko Bulawayo, ubelalisiwe yilo umkhuhlane.
"Bengigula ,bengigula sibili, haa ibingitshayile iCholera, ibingitshaye kakhulu kodwa khathesi sengingcono , ngahamba eThorngrove esibhedlela yikho ukuthi ngize ngibengcono lami kodwa ngangiphatheke kakhulu ngendaba yeCholera."
Umhlali welokitshini eleCowdray Park, ko Bulawayo, uMnu Cleopas Chiripamberi, uthi kezwa kuhle esiswini mhlaumbe ingaba yiyo iCholera.
"ICholera leyi ngiphombu'kuyizwa ngayo ukuthi abantu bayaphela abantu babulawa yizisu,kuthiwa ngamanzi lawa amanye esiwanathayo, so angiwazi ukuthi kuyini. Mina lami so angizwa kuhle isisu sami so sibabuhlungu angiwazi ukuthi kuyini.Wonalawo amanzi esiwanathayo awezigubhu amanye anjaninjani njobana amanzi sometimes ayahlupha yazi siyaphombuk'unatha.Imali yokuthenga amanzi asilayo."
UMqondisi wezempilakahle koBulawayo, uDokotela Edwin Nkosinathi Sibanda Mzingwane uchasisa ngesimo seCholera, kuleli dolobho.
"KoBulawayo sokutholakele abantu abaleCholera, kumbe abacatshangelwa ukuthi balomkhuhlane weCholera abangu 12, itshumilambili. Ngikhuluma kusiyafika izolo kulabo bantu bahloliwe batholakala abathathu belawo umkhuhlane, sebelatshiwe bahanjiswa ngemakhaya kwasala oyedwa."
Umkhuhlane wesihudo uzwana lengcekeza. USikhwicamfundo Solwayo Ngwenya osebenza esibhedlela seMpilo koBulawayo uxhwayisa uzulu ngalumkhuhlane.
"Isuhudo lesi sitholakala nxa umuntu edlile kumbe wanatha amanzi angahlanzekanga.Liyaxwayiswa ukuthi ke nxa lihamba lingahambi liqhawula abantu izandla,njalo lihlambulule izadla kukho konke lingakadli, lezinto elizithengileyo amaOrange konke lani liqale likuhlanze emanzini ngoba lumkhuhlane uyingozi umphefumulo womuntu uyatshabalala kusiya ngamahola.”
Ugatsha lwezempilakahle luthi umkhuhlane wesihudo ubhahe kakhulu eHarare leMasvingo njalo sokufe abantu abedlula ikhulu kusukela ekuqaleni kwalumnyaka.