UMnu. Sengezo Tshabangu ozithi ungunobhala jikelele webandla le CCC uthi kaxotshanga umholi welinye lamacele alelobandla uMnu. Welshman Ncube njengalokho okubikwa ngeminye imsakazo lamaphephandaba, kodwa wathola iseluleko esivela kumagqwetha esokuthi umsebenzi usufike komlind'yacina kubo bonke abangena ezikhundleni kulandela umhlangano weCongress ka 2019.
Uthi ngalokho, sokufanele kuyiwe kuCongress yokukhetha kutsha abakhokheli.
Lokhu kuvezwe yisikhulumeli sika Mnu. Tshabangu, uMnu. Khaliphani Phugeni yena otshele iStudio 7 ukuthi uMnu. Tshabangu loMnu. Ncube bahlale phansi bacubungula loludaba ngenyanga edluleyo bethola lesi isixwayiso samagqwetha, baphinda njalo lakunsukwana ezedluleyo.
Uqhubeke wathi uMnu. Tshabangu uzaqoqa umhlangano lentathelizindaba kunsukwana ezilandelayo lapho azahlela inyathelo elilandelayo.
UMnu. Phugeni wengeze wathi uMnu. Tshabangu uqonqosele ukuthi labo abangamukeli iseluleko samagqwetha kufane betsho ukuthi bona bafuna kwenziweni.
Ugcizelele ukuthi uMnu. Tshabangu ulelungelo lokwenza lokhu njengokuvezwa zindaba ezikhwezwa emthethwandaba zifike ziphumelele.
UMnu. Phugeni ulandule ukuthi kungabe kulombango wemali ephiwa amabandla ezombusazwe ngomthetho we Political Parties Finance Act, esithi isixwayiso samagwetha sethulwa mhlaka 12 ngenyanga edluleyo ngakho udaba lwemali alungeni kulolu olokuthi umsebenzi walabo abaphethe izikhundla abazithola ngo 2019 usuphelile.
Your browser doesn’t support HTML5
Ingxoxo loMnu. Khaliphani Phugeni
UMnu. Willias Madzimure, obona ngokwethulwa kwembiko kubandla le CCC elikhokhelwa nguMnu. Ncube, ulandule ukuthi kwake kwaba lomhlangano loMnu. Tshabangu.
Uthi uMnu. Ncube ubelolwazi ngaloludaba ngeSonto edluleyo.
UMnu. Madzimure ugcizelele wathi ngempela ibandla lakhe liyazi ukuthi kufanele kuyiwe ku congress njalo lilazo zonke ingatsha zebandla ezingaqhuba lumsebenzi.
Uthi kodwa akudingeki ukuthi uMnu. Tshabangu kube nguye ophawula lokhu ngoba engakhethwanga ngokusemthethweni ukuba aphathe isikhundla sikanobhala jikelele.
Wengeze wathi indlela okwabiwe ngayo imali yebandla iyadanisa ngoba bekufanele iphiwe iCCC kulokuthi iphiwe umuntu oyedwa.
Your browser doesn’t support HTML5
Ingxoxo loMnu. Willias Madzimure