Usibalukhulu wesigaba seMinnesota uMnu Tim Walz wamukele ukukhethwa kwakhe ukuthi angene engumsekeli kamongameli webandla leDemocratic Party ngelanga lesithathu lomhlangano omkhulu oweDemocratic National Convention.
Esungula usuku lwesithathu lomhlangano weDemocratic National Convention eChicago, uSenator weNew Jersey uMnu Cory Booker ukhulume ngenjongo yosuku lolu.
“Siyalamuleka kulanga lesithathu njalo namuhlanje sixoxa ngozibuse.”
Abakhuphe imibiko kulumhlangano bebekhuluma ngokuthi abasekeli bebandla leDemocratic Party bathi kumele kukhethwe bani kukhetho lokudinga umongameli wlemelika ngoLwezi.
“UKamala Harris ngowabantu … njalo omunye lowu ngumuntu ongelandaba labanye, uziqakathekisa yena yedwa,” kutsho uMnu Clinton.
Owake wabangumongameli weleMelika uMnu Bill Clinton ngomunye wabakade bekhangelelwe kakhulu ngabanengi kulumhlangano. UMnu Clinton, owangena yonke imihlangano yeDemocratic National Convention kusukisela ngomnyaka ka 1972, usebenzise ulwazi lwakhe njengomuntu owake wabangumongameli ukuchaza ukuthi kungani ebona sengathi umsekeli kamongameli uNkosikazi Kamala Harris nguye ofanele abe ngumongameli.
“UKamala Harris uzalwisana lendubo zethu, uzamisa ukwesaba kwethu njalo uzakwenza ukuthi izizalwane zonke zeMelika zigcwalisise amaphupho azo.”
Kodwa abasekeli beDemocratic Party abanengi bebemelele usibalukhulu weMinnesota uMnu Tim Walz, owamukele ukukhethwa kwakhe ukuthi abe ngumsekeli kamongameli.
“Kuyinjabulo enkulu ukwamukela ukukhethwa kwami ukuthi ngibe ngumsekeli kamongameli weleMelika.”
UMnu Walz, owayekubutho, wake wabangumbalisi njalo waqeqetsha iqembu lebhola leAmerican Football kanye lele basketball elezifundi zeHigh School, uthi imisebenzi ayenzayo yamphathisa kakhulu ukulungiselela ubukhokheli bezombusazwe.
“Izifundi zami zangikhuthaza ukuthi ngingene kuCongress. Zabona kimi izinto engangizama ukuzifundisa; ezifana lokuzinikela ekwenzeni okuhle, ukuzwisisa ukuthi kumele sisebenze ndawonye njalo umuntu oyedwa uyenelisa ukuletha umahluko esigabeni.”
Ibandla leDemocratic Party namuhlanje lizagqiba umhlangano walo oweDemocratic National Convention, umsekeli kamongameli uNkosikazi Kamala Harris ekhangelelwe ukuthi uzakwethula umbiko wokwamukela ukukhethwa kwakhe ukuthi amele lelibandla kukhetho lukamongameli weleMelika.
Okugcweleyo ngaloludaba: Udaba esilwethulelwa nguTaboka Ncube.