Ummeli weGokwe-Nembudziya edale lephalamende njalo elilunga leZanu PF uMnu Justice Mayor Wadyajena, yena obotshwe ngempelaviki umiswe phambi komthethwandaba kamantshi eVictoria Falls ngoMvulo esetheswa icala lokuthuka uNkosikazi Grace Mugabe lelinye ilunga leZanu PF uMnu Jimayi Muduvuri.
Ngakwelinye icele umphathintambo wezabalwa impi yenkululeko, uMnu. Chris Mutsvangwa usemiswe ukuba lilunga lebandla leZanu PF esetheswa amacala ambalwa agoqela ukudelela uNkosikazi Mugabe.
Amalunga alelibandla esigaba seMashonaland West enze ukhetho lwe vote of no confidence bavumelana ukuthi uMutsvangwa kaxotshwe ebandleni.
UWadyajena uhlawuliswe amakhulu ayisitshiyagalombili amadola esibambiso njalo uzaphenduka emthethwandaba mhlaka 5 ngoZibandlela, kutsho igqwetha lakhe uMnu Givemore Muvhiringi.
UMnu Wadyajena ubotshiswe nguMuduvuri ngoMgqibelo esithi umthethisile waphinda wathuka uNkosikazi Mugabe ekupheleni komhlangano weZanu PF oqhutshelwe eVictoria Falls.
UWadyajena ubikwa esekela uMnu Emmerson Mnangagwa njalo uMuduvuri ubikwa ekucele eliphikisana loMnangagwa elizibila ngokuthi yiG40.
Ingcwethi kwezombusazwe uMnu Nkululeko Sibanda utshele iStudio 7 ukuthi kusobala ukuthi isisusa secala leli yikulwisana phakathi kwecele leG40 lelikaMnu Mnangagwa.
"Udaba lolu lutshengisa ukuthi ukulwisana okukhona kuZanu PF phakathi kwenhlangothi ezithile kuya phambili kusiba kubi," kutsho uMnu Sibanda.
Your browser doesn’t support HTML5
Ingxoxo loMnu Nkululeko Sibanda