Abasekeli babancintisa kukhetho lukaMongameli weMelika uMnu Tim Walz loMnu JD Vance bangqikilene kungxoxompikiswano eqhutshwe ngoLwesibili ngumsakazo weCBS batshiyana ngemibono entweni ezimqoka ezithinta impilo kazulu.
Ababili laba bathinte indaba ezifana lolosungula imisebenzi, ukuhlonitshwa kwamalungelo abesifazana okuthi bakhiphe izisu kanye lodaba lwabantu bokuza abangena eMelika bengelamaphepha.
Abancintisa bephambili kukhetho lolu besekelwa ngababili laba nguMnu Donald Trump owebandla lamaRepublicans, osekelwa nguVance loNkosikazi Kamala Harris owebandla lamaDemocrats, yena osekelwa nguWalz.
Ekhuluma ngodaba lwabantu bokuza uVance - yena othi abantu abavela eHaiti bantshontsha omangoye babanikazi lezinja besidla edolobheni leSpringfield eOhio - uthe uzulu waseMelika usethwele nzima ngokuswela izindlu zokuhlala ngoba sezithathwa ngabantu abavela kwamanye amazwe abangelamaphepha.
“Imbadalo ye-rent iyadula ngenxa yezigidi zabantu bokuza abangelamaphepha abathatha izindlu ezivele zisilela. Ngiphatheke kabi ngezizalwane zeMelika ezihlala eSpringfield esezidilizelwe impilo zazo yimithetho kaKamala Harris yokuvumela abokuza ukungena kuleli mahlayana,” kutsho uVance.
Evikela uNkosikazi Harris, uMnu Walz ukulandule lokhu esithi uVance loDonald Trump kumele batshiye umkhuba wokugcona abantu bokuza bebethesa amacala abangawadalanga.
Uphinde wasola uTrump loWalz esithi abahloniphi amalungelo abantu besifazana ngoba besekela imithetho ebavimbayo ukuthi bakhiphe izisu nxa kukhona okuhluphayo.
Uthe, “Singatsho kanjani njengelizwe ukuthi impilo yakho lamalungelo akho agoqela ilungelo lokwenza okufunayo ngomzimba wakho, kulawulwa ngokuthi uhlala ngaphi?”
UMnu Vance ukuvumile ukuthi ngempela amalungelo abantu besifazana aphathelane lempilakahle yabo kumele ahlonitshwe, kodwa uthe ilungelo lokuthi bayavunyelwa yini ukukhipha izisu kumele libe ngumlandu wezabelo hatshi uhulumende wezwelonke.
Ukhuthaze njalo uzulu ukuthi avotee yena loTrump ngoba bezaletha intuthuko, kodwa uWalz uthe ababili laba balakho ukubuyisela ilizwe emuva bengakhathwa; ngakho bathi uzulu kumele akhethe yena loNkosikazi Harris abe ngumongameli.
Ingxoxompikiswayo yayizolo ibingelakuxokozela okubekhona kwekaTrump loHarris kunsukwana ezedluleyo, kutsho olandela ezombusazwe weMelika uMnu Tim Muringai, yena othi iVance nguye onqobileyo.
Ukhetho lweMelika luzaqhutshwa mhlaka 5 ngenyanga ezayo lapho abantu abazakhetha khona uMongameli omutsha phakathi kukaTrump loNkosikazi Harris.
Ozanqoba uzathatha intambo kuMongameli Jose Biden.