Umkhokheli webandla eliphikisayo ele Movement for Democratic Change umnumzana Morgan Tsvangirai, wethekelele emzini we Epworth duzane leHarare ngoLwesine, ukuze ayezibonela ngokwakhe, inhlupho uzulu walendawo abhekane lazo kanye lokuba lubhahe okunganani udubo lobuyanga kulindawo.
Abantu be Epworth, inengi labo abangabasekeli bebandla lakhe abasemikhukhwini ebalisa ePentagon,Solani kanye le Overspill, abaxotshwayo yiBoard yalindawo bemba phansi bethi abayi kusuka lapho abahlezi khona.
Labo ngabantu abahlala endaweni ebizwa ngokuthi yi Pentagon etholakala e-Epworth ngesikhathi umkhokheli welinye lamacele eMDC, umnumzana Morgan Tsvangirai, efika lamuhla emini kuhambo lwakhe lokuyabona indlela uzulu wakule indawo aphila ngayo.
UTsvangirayi utshengise ukukhathazeka,wathi ukwakhiwa kwemikhukhu abahlala kiyo kuyisibonelo sokuba abantu badinga indawo zokuhlala ngakho uhulumende kumele akulungisise lokho abatholise indawo yokuzakhela imizi engcono.
Wengeza ethi kusobala ukuba uhulumende we Zanu Pf usehlulekile ukutholisa uzulu okudingakalayo okubalisa amanzi ahlanzekileyo, izambuzi kanye lendawo zokuhlala ama stand.
Umnumzana Abenico Bhebhe obona ngokuqoqwa kwenhlelo ze MDC-T ugcizelele amazwi womkhokheli wakhe wokuthi baye kulolu hambo e Epworth ukuyazibonela ngokwabo ukuba bunzima bani uzulu wakulendawo ahlangana lalo.
Uthi njalo uBhebhe sebekuzwile ukuhlukuluzwa kwabantu be Epworth abatshele inkokheli ebezikulolu hambo lo Tsvangirai ukuba babandlululwa kokuphela amalunga ebandla le Zanu Pf, ebadlisa imbuya ngoluthi sikhathi sonke.
Lezi zakhamizi zitshele umkhokheli wazo ukuba zifuna uhulumende we Zanu Pf, abatholise ingwalo ezidingakalayo ukuba bahlale okusemthethweni hatshi ukube lokhe bebhidlizelwa imizi yabo kokuphela kanye lokuhlukuluzwa ngabebandla.
Unkosazana Letwin Ncube ungomunye wezakhamizi esezileminyaka emine ehlala lapha e Pentagon.Ubhidlizelwe umuzi abehlala kiwo yena labanye bakhe kuthiwa bakhele endaweni engavunyelwayo, batshaywa belala phandle ngokwesaba lanxa ethi sekunganeno selokhu lwabuyiselwa edale udaba lwabo.
Umkhokheli weMDC-T ukhulumisane lozulu weEpworth eqala ngase Pentagon Stoop, lapho akhulume phezu kokusilelayo okubalisa amanzi ahlanzekileyo.Usuke lapho walubhekisa emkambo ye Solani wagqiba uhambo lwakhe ngokuya ekilinika ye Overspill lapho inkokheli zakulesi sibhedlela zingafunanga ukukhulumisana laye ngobe zisesaba.