Umkhokheli welinye lamacele eMDC umnumzana Morgan Tsvangirai usola abezinkonzo ngokuzithulela bekhangela eceleni uhulumende esephula amalungelo abantu ethi abamasonto noma bengamanga besekela amabandla athile kwezombusazwe balelungelo lokukhuza uhulumende bengabona esephula amalungelo abantu.
UTsvangirai utsho lokhu emhlanganweni lenhloko zamabandla okholo lwesi Khristu owe International Conference of African Prophets owenzelwe e Harare ngoLwesine esithi abezinkonzo baphathisa kakhulu singakatholi uzibuse bekhuza izenzo ezingalunganga njalo bephathisa ukutholisa uzulu imfundo. Uthe ngemva kokuthola uzibuse ababamasonto bacine bekhetha ukuzithulela bengakhuzi uhulumende ephazamisa amalungelo abantu.
Uthi kwaba lokuthula kwabafundisi abantu behlukuluzwa enikeza umzekeliso wokuhlaselwa okwenziwa abantu kweleMandebeleni lase Nkabazwe ngesikhathi se Gukurahundi kunye lokuhlukuluzwa kwabantu kudlakela ngezikhathi zokhetho.Uthe noma abamasonto bemele besebenzelane lohulumende ezintweni ezithile kumele bengasekeli hlangothi njalo bengabi ngamabandla aphikisayo kodwa ukuba bebeseqinisweni kuphela bevikela abahlukuluzwayo esola kakhulu amasonto asebonakala ephuma egcekeni esekela amabandla ezombusazwe.
Kodwa uBishop Godwill Shana wenhlanganiso ye Evangelical Fellowship of Zimbawe uyaphikisa kulokhu ethi kukhona abakwenzayo njengamasonto kodwa bezama ngayo yonke indlela ukuba kungabi lokupixana lohulumende ngokukhuluma imicijo yabo yonke kuzulu ethi baphathisa ekulotshweni kwesisekelo sombuso esitsha baphinda babamba imihlangano lomongameli Thabo Mbeki esabusa kwele South Africa kudaba lokubunjwa kukahulumende womanyano kuleli.
UBishop Thabo Masenya wakwele South Africa uthi umhlangano lo uqakathekile kakhulu ngoba ujonge intuthuko lokulwisana lendlala ezwekazi leAfrica.
Lumbuthano ungenwa ngabafundisi lamaProphet avela emazweni akuzwekazi le Africa edlula angamatshumi amathathu okugoqela i Zambia, siera Leon, Benin, Nigeria, South Africa le Ivory Coast phakathi kwamanye njalo uphela kusasa.