Emizameni yokuqeda ukufuthelana okukhona phakathi kwabaphathintambo bakahulumende lamalunga edale lephalamende ngoMvulo, inhloko kahulumende uMnu Morgan Tsvangirai uqhube umhlangano lamalunga lawa eHarare ewakuthaza ukuthi asebenzelane ndawonye.
Abaphathintambo, ikakhulu abebandla leZanu PF babikwa becele uTsvangirai kunsukwana ezedluleyo ukuthi angenele akhuze amalunga edale ngoba besithi atshengisa ukuweyisa nxa ethe abizwa phambi kwedale ukuzekupha ukufakazi.
Ngakwelinye icele amalunga edale wona athi abaphathintambo beyisa idale ngokwehluleka ukuzefakaza nxa bethe babizwa. Abasiki bebunda bathi omunye okhonona ngokweyiswa ngamalunga edale ngumphathintambo obona ngezenjiwayo uMnu Obert Mpofu.
UMnu Mpofu usole amalunga edale emhlanganweni wangoMvulo esithi kungani ebize umabhalane wakhe engamazisanga ngeviki edluleyo ukuthi azefakaza edale lephalamende ngamadayimana enjiwa eChiyadzwa.
Ephendula, umabhalane wedale lephalamende uMnu Austive Zvoma uthe bekungadingeki ukuthi idale licele imvumo kuMpofu yokubiza umabhalane wakhe ukuthi azefakaza. UTsvangirai ubikwa ekhuthaze ukusebenzelana kuhle phakathi kwamalunga edale labaphathintambo bakahulumende.
UNkosazana Thabitha Khumalo, olilunga ledale lephalamende ekucele leMDC utshele uNtungamili Nkomo weStudio 7 ukuthi akuqondanga ukuthi amalunga edale eyisa abaphathintambo, esithi abaphathintambo yibo abeyisa idale ngokwehluleka ukuziveza phambi kwalo nxa bethe babikwa.