Inhloko kahulumende uMnumzana Morgan Tsvangirai lequla lakhe labantu abalitshumi lasitshiyagalolunye akade bekhangelelwe ukuya emhlanganweni wezomumo womkhathi owenzelwa e Copenhagen kwele Denmark, bathi kabasayi.
UTsvangirai wethule lumbiko kuwebsite yakhe lapha athe njengoba uMongameli Robert Mugabe esiya emhlanganweni lo akudingeki ukuthi laye abekhona njengoba bonke bemele ilizwe leZimbabwe.UMugabe uya emhlanganweni lo ekhatshwe ngabantu phose abangamatshumi ayisithupha 59, okuyinto esolwa kakhulu nguzulu, ngenxa yendleko kuhulumende.
UTsvangirai uphinde wathi esinye isizatho sokungayi kwakhe lequla lakhe emhlanganweni lo yilo udaba lwendleko yohambo lolu kuhulumende.
Umphathintambo obona ngezemali uMnumzana Tendai Biti esethula i budget ka 2010 uthe kusiyafika kunyanga edluleyo ekaLwezi uhulumende ubesesebenzise izigidi phose ezingamatshumi amathathu zamadollar eMelika-US$28 million kundleko zokwethekelela amanye amazwe kuphela.
UMnumzana Zenzo Nkomo yingcwethi ecubungula ezombusazwe.UNkomo utshele uBrenda Moyo weStudio 7 ukuthi uhulumende kumele aqakathekise inswelo zelizwe hatshi ukuchitha imali ngenghambo ezingaletheli ilizwe inzuzo.