Sokulokuxokozela okumangalisayo eMelika kulandela okwethulwe nguMongameli Donald Trump othi ulakho ukusebenzisa akuthola kwamanye amazwe ukuthi alwisane laphikisana labo kukhetho lukamongameli.
UTrump wethule lokhu ngesikhathi exoxa lentathelizindaba yeABC. Ikhomishini yokhetho ithi uTrump ukhulume inxwala ngoba akuvunyelwa ukusebenzisa okutholakala kwamanye amazwe ukwenzela ukulwisana lophikisana labo kwezokhetho.
UTrump uthi engakusebenzisa angakuthola.
“Umuntu engafona eselizweni leNorway esithi kulento okumele ngiyizwe ngengincintisana laye, ngibona engani ngingafisa ukuzwa ngakho lokhu. Nxa ngingabona ukuthi kulento embi ngingahamba emapholisini ensitha aweFBI.
“Nxa umuntu engaphuma locwaningo oluphezulu angiboni ukuthi ungabiza iFBI ukuthi izakhangela lokhu ngoba iFBI kayilabantu abeneleyo abangakwenza lokhu. Bayakwenza labakudale leCongress. Kuthiwa lucwaningo oluphezulu.”
Abanengi kubandla lakhe elama Republicans lama Democrats bathi uTrump ulahle umlomo ngoba akuvunyelwa ukhuluma ngakho.
Omunye wabaphikisana lakwethuleyo nguSenator Lindsey Graham, okhokhela ibandla lama Republicans edale leSenate.
“Ngibona engani uphambanisile okusemthethweni. Kangifuni ukukhuluma engani ngikhuthaza lokhu. Akumelanga kwenziwe.”
USenator. Mitt Romney, owake wancintisa kukhetho lukamongameli ekubandla lama Republicans, uvumelana loSenator Graham.
“Uzabhidliza indlela esibusa ngayo.”
Ibandla lama Democrats lithi kuyethusa okukhulunywe nguTrump. UNkosikazi Nancy Pelosi, umkhokheli wama Democrats edale leHouse of Representatives, uthi uTrump ukhuluma angakwaziyo.
“Wonke umuntu wethuswa yinkulumo yakhe le. Kakwazi umehluko phakathi kwamanga leqiniso. Kuyadanisa lokhu. Kuyakhanya ukuthi kukhona akufihlayo okungekho emthethweni. Sengike ngakutsho lokhu.
Uthi umthetho wakwele Melika okhangelane lezokhetho kawuvumelani lokukhulunywe nguTrump.
“Kulomthetho othi ungeke wamukele okutholakala kuhulumende wakwamanye amazwe. Kumele ubikele amapholisa aweFBI. Akuvunyelwa ukuthi ukwenze. Sizakuhlolisisa lokhu ngokubikela iFBI.”
Ingcwethi kwezombusazwe, uMnu. Gary Thwala Jackson, uthi kuyayangisa owenziwa nguTrump.
Kusanda kwethulwa uphenyo olwenziwa nguMnu. Robert Muller owayehlolisisa ubudlelwano buka Trump lelizwe leRussia ngesikhathi sokhetho lukamongameli ngomnyaka ka2016.
Kuzakwenziwa olunye ukhetho ngomnyaka ka2020.