Kumkhankaso wokudinga umongameli weleMelika, ozamela ibandla leRepublican Party kulolukhetho uMnu Donald Trump usezancintisana lomuntu omutsha kulandela ukuphuma kulumncintiswano kukamongameli Joe Biden.
Intathelizindaba yeVOA uScott Stearns ukhangela ukuthi umkhankaso kaTrump usuguquka njani elungiselela ukuncintisana lomsekeli kamongameli uKamala Harris.
Abasekeli bebandla leRepublican Party ngeviki edluleyo bebesemhlanganweni wabo omkhulu oweConvention njalo babekubonile ukuthi banengi abakhuthaza umongameli Joe Biden ukuthi aphume kulumncintiswano ngakho uthe ephuma bebelungiselele.
Kumkhankaso wakhe wakuqala esekhangelelwe ukuthi engaba nguye omela ibandla lamaDemocrats kulolukhetho uHarris ubelungiselele ukukhumbuza abavoti umsebenzi awenzayo engumtshutshisi njalo eligqwetha elikhulu lesizwe.
"Ngisezikhundleni lezi ngalwisana lezikliwi ezitshiyeneyo. Abahlukumeza abesifazane, amasela atshontshela abathengi, abephula umthetho ngendlela ezitshiyeneyo. Ngakho lalelani nxa ngisithi ngiyabazi abafana loDonald Trump."
UHarris uqala kakutsha umkhankaso obukhokhelwa ngowayengumongameli uMnu Donald Trump, kutsho ingcwethi yezombuso eyeBrookings Institution uDarrell West.
“Uzakhokhela kakhulu kumkhankaso ezigabeni ezithi iPennsylvania, Michigan leWisconsin. Njalo ngibona sengathi uzathatha njalo ezinye izigaba ebezingathi sezithathwa ngamaRepublican ezifana le-Arizona.”
Kozamela ibandla leRepublican Party uTrump, ukuncintisana lomuntu omutsha sekusitsho ukuthi uzakuza lelinye ibizo lokuhaya.
“Ngimuthi ngumahleka uKamala. Uyake umbone ehleka? Uyahlanya. Uyakwazi ukuthi ubona okunengi ngokuhleka komuntu. Hatshi, uyahlanya. Kazithathi kuhle.”
Ngumkhankaso olethemba lokunqoba ibandla leDemocratic Party, kutsho uMeena Bose owekolitshi leHofstra University.
“Kusegcekeli ukuthi owake wabangumongameli uTrump lezisebenzi zomkhankaso wakhe babebona sengathi kulula ukunqoba umongameli Biden. Kukhanya balombono ofanayo ngomsekeli kamongameli uHarris.”
Utshintsho lolu lutsho ukuthi ibandla lamaRepublicans kuzamele liguqule amaqhinga kutsho uWest.
“Sekufamele baqale kutsha umkhankaso wabo obusithi uJoe Biden useluphele, ngakhoke kasoze enelise ukusebenza, njalo imuli yakhe ilobuqili... konke lokho akusekho. Kodwa ngibona sengathi bazaqala ukuhlasela ngokuphangisa. Bazakunanzelela ukuthi uvela esigabeni seCalifornia, esilenkululeko ukwedlula ezinye.”
Ongena kulolukhelo loTrump uJ.D. Vance useqalile ukuhlasela esethesa umsekeli kamongameli uHarris umlandu wokuthi nguye owabangela ukungaphumeleli kukaBiden.
"Ilizwe lethu belithwele nzima okweminyaka emithathu lengxenye edluleyo, likhokhelwa ngumongameli ongenelisi ukuqhuba umsebenzi wakhe njalo konke lokhu kungumlandu kaKamala Harris lamalunga ebandla lamaDemocrats awaqamba amanga esithi uyenelisa ukukhokhela ilizwe."
UHarris uthi abavoti balethuba lokukhetha phakathi kombono wakhe lokaTrump.
"Sifuna ukuhlala elizweni elilenkululeko, ukuzwelana lokuhlonitshwa komthetho na? Kumbe ilizwe elingahlelekanga, elilokwesaba lenzondo na? Njalo okuhle ngalesi sikhathi yikuthi sonke silamandla okuphendula lumbuzo. Amandla asebantwini.”
Ucwaningo losekelo lwabavoti luveza ukuthi kusukisela ngesikhathi uBiden etshiya uHarris uqhubekela phambili evala igebe ebelikhona phakathi kwebandla lakhe loTrump okhokhelayo.
SEE ALSO: Lalelani Okugcweleyo ngaloludaba.