Amapholisa ensitha awe-FBI athi kulomuntu ozame ukubulala owake wabangumongameli weMelika uMnu Donald Trump esenkundleni yakhe yeGolf eWest Palm Beach, eFlorida.
UTrump ubonge abezomvikela abeSecret Service lamapholisa, kulandela ukusinda kwakhe.
Isehlakalo lesi siza ngemva kokuba uTrump edutshulwe endlebeni kunyanga ezimbili ezedluleyo ekhankasela ukhetho ePennsylvania.
Abavikela uTrump kubikwa bebone umuntu obethwele umbhobho ecatshile esixukwini eduze lalapho uTrump abedlalela khona iGolf.
Bahle baqala ukudubula kodwa uRyan W. Routh wabaleka, wasebotshwa ngamapholisa ngemva kwesikhatshana.
Amapholisa athi ubaleke watshiya umbhobho wohlobo lwe-AK-47, i-camera lezikhwama ezimbili.
Umongameli Joe Biden usole udlakela lolu wabongela ukuthi uTrump akalimalanga.
Umsekeli wakhe okhangelelwe ukuncintisana loTrump kukhetho ngoLwezi, uNkosikazi Kamala Harris, uthe isehlakalo lesi siyadanisa njalo udlakela alwamukeleki eMelika.
Laloba sekungokwesibili uMnu Trump ehlangana lesehlakalo sokuphosa abulawe ngombhobho olandela ezombusazwe weleMelika uMnu Masimba Kuchera uthi akaboni uTrump eguqula umbono wakhe ngodaba lwezibhamu eMelika.
SEE ALSO: Ingxoxo loMnu Masimba Kuchera.