Abantu baseMelika besiyavota nje kukhetho lukaMongameli ngoLwesibili, abancintisayo ababalisa umsekeli kaMongameli uNkosikazi Kamala Harris loMnu Donald Trump, yena owake waba nguMongameli, bangutshiki lobhanqa.
Lokhu sokudale ukuthi amagqwetha ababili laba ahlale elindele ukuya emthethwandaba alubana kuthe kwaqhamuka ukudonselana phezu kwempumela yalolukhetho.
Ekuqaleni kwalonyaka oncintisa emele ibandla lamaRepublicans uMnu Donald Trump utshele intathelizindaba ukuthi ukhetho lungaqhutshwa ngendlela ethembekileyo njalo ekhululekileyo uzayamukela impumela yalo.
Lanxa iziphathamandla ezibona ngezokhetho zisithi ziyasuthiseka ukuba luzaqhutshwa kuhle futhi ngendlela esobala, uTrump akakukholwa lokhu ngoba uthi labo ancintisana labo bazama ukuqilibezela.
“Kumele sinqande ukuqilibezela lokhu, ngoba bangamaqili. Nxa singenza lokhu, sizanqoba ngendlela ejabulisayo,” kutsho uTrump.
Oncintisa kukhetho lukaMongameli emele iRepublican Party uMmu Donald Trump.
Ekhuluma emsakazweni weNBC kuhlelo lweNightly News ngenyanga ephelileyo, uNkosikazi Harris utshele intathelizindaba uHallie Jackson ukuthi amagqwetha akhe azathatha amanyathelo nxa uTrump enganqotshwa abesesala okwamukela impumela.
Uthe, “Sizabhekana losuku lokhetho kanye lamalanga alandelayo ngokuza kwawo futhi silalo ikhono lobungcintshi bokuphatha lesisimo.”
Oncintisa kukhetho lukaMongameli emele ibandla leDemocratic Party uNkosikazi Kamala Harris.
I-National Committee yebandla lamaRepublicans ilohlelo elubiza ngokuthi yi“Election Integrity Program” ezabelweni ezingeyamelanga kuhlangothi, ama-battleground states.
Amagqwetha ayo asekhweze emthethwandaba amacala angaphezu kwekhulu ekhala ngokuthi kukhyona okungahanjiswa kuphe okuphathelane lalolukhetho, kodwa amacala amanengi achithiwe yimithethwandaba.
Abebandla lamaDemocrats labo sebekhweze amacala athize emthethwandaba, agoqela elokuzama ukwenqabela ukuphuza kokwaziswa kwempumela yokhetho esigabeni seGeorgia.
Abacubungula ezombusazwe bathi ukuphikisana emithethwandaba kulakho ukwenzeka nxa abancintisanayo bengutshiki lobhanqa njengakulolukhetho, futhi bathi ukuphikisana okunengi kuzaqhamuka ezabelweni ezingavotela yibona ngubani ama-battle ground states.
FILE - Inkantolo yeU.S. Supreme Court eseWashington DC, Oct. 21, 2024.
Ohlaziya eziphathelane lombuso wentando kazulu njalo esebenza lenhlanganiso yeBipartisan Policy Center uMnu Michael Thorning uthi, “Endaweni zokuvotela kuvame ukuba lokuphikisana ngokuthi amavoti aphathwa ngemfanelo yini. Ngosuku olulandela olokhetho kuba lokudonselana phezu kokuthi abantu-thize balelungelo lokuvota na, kanye lokuthi amavoti abo kufuzwe abalwe yini kumbe engamukelwa.”
Ingcwethi kwezemithetho zithi lowo oyabe esithi kulokudlelezela kukhetho, kumele ethume ubufakazi obubambekayo.
“Amagqwetha kumele eqaphelani lokho akusolayo. Kumele abe leqiniso lokuthi alobufakazi. Ngaphandle kwalokho, angazithola esejeziswa njengalokhu esikubone ngemva kokukhetho luka2020,” kutsho owake waba ngumahlulelo uRobert Graci, yena oseligqwetha futhi olilunga lendlanganiso ezimeleyo ebizwa ngokuthi Keep Our Republic.
Njengomzekeliso, owayeligqwetha likaTrump uMnu Rudy Giuliani wathathelwa isithupha sobugqwetha ngemva kokufafaza amanga ngokhetho luka2020 esithi kwaba lokuqilibezela.
Ukuphikisana emithethwandaba kulakho ukuphuzisa impumela yokhetho. Kodwa nxa ngoLwesibili impumela ingaveza ukuthi ukhona okhokhela angamavoti amanengi, igncwethi zithi kuzabanzima kulowo oyabe enqotshwa ukuthi ephikise limpumela.
Intathelizindaba yeVOA News uVeronica Balderas Iglesias nguye olobe loludaba ngesiNgisi lwahumutshwa nguNtungamili Nkomo.
Your browser doesn’t support HTML5
Udaba siluphiwa nguNtungamili Nkomo weStudio 7