Iphephandaba leChronicle selimise umsebenzi umadweba walo (ucartoonist) ngemva kokuhlaselwa nguzulu phezu komfanekiso ophume kuleliphephanda ukhanya uhlambaza abesifazana abadabuka eMidlands leMatabeleland.
Umfanekiso lo ubulabesifazana ababili besedlula duzane lebhakane elibhalwe ukuthi izikolo zeMidlands lezeMatabeleland yizo ezisemsileni ekuphumeleleni kwabafundi lonyaka.
Ababili laba bagqoke izigcebhezane.
Omunye wabosisi laba ubesithi komunye lanxa izigaba lezi zigaphumelelanga kwezemfundo, kumele baziqhenye ngokuthi kukhona lapho eziphumelela khona kwezinye indawo.
Abanye bathi ababili laba babonakala njengamakhikhitha, ngalokho umfanekiso weChronicle lo uveza abesifazana bezigaba lezi njengabantu abangelandaba lesikolo njalo abaqakathekisa kakhulu ezemacansini.
Umhleli waleliphephandaba uxolisile kuzulu enkundleni yeTwitter, wazisa ukuthi umadweba walumfanekiso semiswe umsebenzi kancane lusahluzwa loludaba.
Omunye wabasole lumfanekiso yisiphathamandla senhlanganiso elwela amalungelo abesifazana, iWoza, uNkosikazi Magodonga Mahlangu.
Kunjalo nje, amalunga edale lephalamende avela eMatabeleland atshengise ukuthukuthela okukhulu edale phezu kwababalisi abafundisa esigabeni lesi bona bengakwazi ukukhuluma ulimi lweSiNdebele.
Your browser doesn’t support HTML5
Ingxoxo loNkosazana Magodonga Mahlangu
Ilunga laleli dale uNkoszana Thabitha Khumalo utshele iStudio 7 ukuthi lokhu yikho okwenza abafundi abanengi behluleke ukuphumelela ikakhulu ezifundweni zolimi lweSiNdebele ngoba bafundiswa ngabantu abangalwaziyo ulimi.
Your browser doesn’t support HTML5
Ingxoxo loNkosazana Thabitha Khumalo