Umdlali wase Zimbabwe odume emhlabeni jikelele emdlalweni wokuntsheza uKirsty Coventry uthole imendulo yegolide ngosuku lwesithathu olwemidlalo ye African Games eqhutshelwa elizweni le Congo Brazzaville.
Uqhubekela phambili esenza izimanga ebhukutshweni uKirsty Coventry yena ozafikisa iminyaka engamatshumi amathathu lambili eyokuzalwa mhla zilitshumi lesithupha kuyonale inyanga.
Lumdlali owaziwa umhlaba wonke ngemva kokunqoba ngendlela emangalisayo kumidlalo yama Olympics ngomnyaka ka 2004 langomnyaka ka 2008, uthole imendulo yakhe yegolide yetshumi lambili kumidlalo yama African Games, yona eyayisaziwa ngokuthi ngeye All Africa Games eminyakeni eyadlulayo, lapho enqoba kumjaho we 100m backstroke ngosuku lwesithathu lwemidlalo ngoLwesibili ntambama.
Limendulo ngeyetshumi lathoba munwe munye nxa sekuhlanganiswa imendulo esezatholwa ngu Kirsty selokhu waqala ukuphatheka kumidlalo ye African Games.
Ingcitshi zomdlalo wokuntsheza zithi ukunqoba kuka Coventry lokhu kuyisibonelo esokuba engenza kuhle kumidlalo yama Olympics ezaqhutshelwa elizweni le Brazil ngomnyaka ozayo.
Kumidlalo yama Olympics eyaba khona ngomnyaka ka 2012 uKirsty udonse nzima ngenxa yokuba wayengezwa kuhle okuyisimo esadala inkulumo phezu kokuba wayesephelelwe ngumphako ngoba esekhulile.
Kusenjalo iqembu elimela ilizwe emdlalweni wenguqu kusasa lizadibana lele Sudan lidinga ukunqoba ukuze lithuthukise amathuba alo awokuthola imendulo kulimidlalo ye African Games.
Iqembu lama Young Warriors lon elikusibaya sinye leqembu elimela ilizwe eliqoqe limidlalo ele Congo Brazzaville linqotshwe nge 1 ka nya ngele Burkisa Faso emdlalweni walo wakuqala ngoMvulo.