wake waba ngumphathintambo wezemali uMnu Tendai Biti ongomunye wabakhokheli belinye lamacele ebandla leCitizens Coalition for Change (CCC) usephiwe isigwebo sokubhadala imali efika amadola akwele Melika angamakhulu amathathu – US$300 ngemva kokutholakala elecala lokuthethisa omunye owesifazana ongusomabhizimusi odabuka kwele Russia.
UBiti ubikwa wethuka uNkosikazi Aleshina ngomnyaka ka 2020 esithi umama lo uyisitshuphedi okuyinhlamba ethathelwe kulimi lwesiNgisi.
Engehluleka ukubhadala imali le, uMnu. Biti uzapika ejele okwenyanga eziyisithupha njalo akumelanga enze icala elifanayo iminyaka emihlanu elandelayo ingakedluli.
Umantshi, uNkosikazi Vongai Guwuriro, uthe abafakazi kudaba lolu bakhuluma amazwi ahambelanayo awokuba uMnu. Biti wathethisa lumama.
UGuwuriro uthi lokhu kwabangela ukuthi owathethiswayo ethuke kakhulu waze wathwalelwa esibhedlela se Trauma Centre.
NgoLwesibili igqwetha lika Biti uMnu. Alec Muchadehama uzame ukuncenga idale lika mantshi ukuba aphiwe isigwebo esinganeno.
Ekhuluma le ntantethelizindaba uMuchadehama uthe kusobala ukuba icala leli lincane kakhulu.
Uqhubeke esithi udaba lolu luzakhwezwa edale laphezulu ele High Court ngoba bengasuthiseki ukuba uMnu. Biti wenza lelicala.
Kodwa omunye owesifazana ongumngane ka Nkosikazi Aleshina uNkosikazi Elizabeth Muchena uthe uthabe kakhulu ngesigwebo esiphiwe uMnu. Biti.
Abatshutshisi bakahulumende kudaba lolu bebefuna uMnu. Biti aphiwe isigwebo esilukhuni besithi ungumuntu omkhulu kakhulu emphakathini njalo waphambanisa ngokuthethisa lumama.
Baqhubeke besithi uMnu. Biti kumele aphiwe isifundo ukuze uzulu abekwazi ububi bokwenza icala elifana lelakhe.