Owayengumeli weZengeza West edale lephalamende osanda kukhululwa ngemva kokuhlala ejele okweminyaka phose emibili, uMnu Job Sikhala izolo usebumbe inhlanganiso yezombusazwe entsha, ebizwa ngokuthi yi-National Democratic Working Group (NDWG).
USikhala nguye umgcinisihlalo, kuthi uMnu Gerald Tavengwa, wakhethwa ukuba ngunobhala jikelele.
Isikhulumeli senhlanganiso le, uMnu Darlington Chigwena, uthi abanye abakhokheli bakhethwe bevela kwezamabhizimusi, amabandla ezokholo, abalwa impi yenkululeko, abasakhulayo lezifundi, abesifazane labakhuzekileyo.
Abakhokheli laba bagoqela uMnu Pearson Mungofa, ongumphathisikhwama, umnu Kuda Munengiwa oqoqa inhlelo zenhlanganiso, uDr Wurayayi Zembe ozakhokhela ezombusazwe, uMnu Comfort Mpofu okhokhela ezabafundi labatsha, Umnu Nicholas Ngqabutho Mabhena okhokhela ezenotho lokuphathiswa kukazulu, uNkosazana Irene Tazvitya okhokhela ezabesifazane, uMnu Tawanda Nyathi okhokhela ezabakhubazekileyo, uNkosazana Yvonne Bosha obona ngokubanjaniswa kwabantu kungelani lokutshiyana kwabo loDr Alexander Chauke okhokhela ezamabanda okholo.
Sixoxe lomunye wabakhokheli balinhlanganiso okhokhela ihlandla labatsha lezifundi uMnu Comfort Mpofu othi inhlanganiso le ngeyomuntu wonke, njalo ekhuthaza abatsha ukuthi baphatheke ngokugcweleyo.
SEE ALSO: Ingxoxo loMnu Comfort Mpofu.Exoxa leStudio7, isikhulumeli sebandla leZanu-PF, uMnu Farai Marapira uthe ukuqala inhlanganiso enje kukaMnu Sikhala akubethusi, njalo bayakukhuthaza.