Kulemibiko ethi umqeqetshi weqembu lenguqu ele FC Platinum, uNorman Mapeza nguye osethethe isikhundla sikamqeqetshi weqembu elimela iZimbabwe elama Warriors ngemva kokuxotshwa umsebenzi kuka Zdravko Logarusic.
Abazi ngokwenzakalayo kuZIFA bathi lumqeqetshi uzancediswa ngu Taurayi Mangwiro ongumqeqetshi weqembu le Triangle kanye lo Mandla Mpofu ongumqeqetshi weqembu le Highlanders.
Umqeqetshi wabonozinti kubikwa kungu Energy Murambadoro yena osebenzela iqembu le Chicken Inn.
Owayengumqeqetshi weqembu labafana abaleminyaka elitshumi lanhlanu elimela ilizwe uDumaza Dube uthi akuqondanga ukuba inhlanganiso ye Zifa iqhatshe abaqeqetshi abavele belamaqembu abawasebenzelayo.
“Mina ngombono wami abakhokhela iZifa kumele bakhethe abaqeqetshi abangela amaqembu abawasebenzelayo. Banengi abaqeqetshi eZimbabwe. Loba kuthiwa bazobamba okwesikhatshana kumele babe ngabaqeqetshi abangela maqembu abawasebenzelayo njengalokhu okwenzakala emazweni afana leNgilandi kanye lakubo Brazil,” kutsho uDube.
Kolunye udaba olumayelana lomdlalo wenguqu, isivumelwano sokuba inkampani ethengisa amafutha emota eye Sakunda yiyo esisekela amaqembu athi ele Highlanders kanye lele Dynamos ngemali lwethulwe okusemthethweni ngoLwesibili ntambama esigodlweni iHarare.
Amaqembu womabili azasekelwa ngemali edlula izigidi ezinhlanu zamadola aseMelika loba nje ezabe ephiwa kuyimali yakwele Zimbabwe.
Phezu kwalokho abaqeqetshi kanye labokaputeni bamaqembu womabili labo baphiwe imota zokusebenzisa.
Ekhuluma namhla emkhosini wokupha abaqeqetshi labokaputeni izimota umnikazi wenkampani ye Sakunda uKudakwashe Tagwirei utshele ukaputeni weqembu le Highlanders uAriel Sibanda kanye lokaputeni we Dynamos uPartson Jure ukuba imota ngezabo ngesikhathi besesikhundleni.
“Imota leyi ngeyakho ukuthi uyisebenzise uhambe layo ngekhaya ihlale kuwe ungayitshiyi emsebenzini.
Kodwa bengakuxotsha ungabuyi kimi, uhambe kibo bayelungisa bona nxa sebekhethe ukuthi kube lomunye ukaputeni,” kutsho uTagwirei.
Isimo besisibi ikakhulu kuqembu leHighlanders enyangeni ezedluleyo lapho ebelingenelisi khona ukubhadala abadlali.
Bakhona kodwa abasole ukusebenzisana kweqembu le Highlanders lo Tagwirei yena osolwa ngokuba udla mganu munye labebandla elibusayo kodwa abanye njalo bathi okuqakathekileyo yikuba iqembu le Bosso lingafi.