UMongameli Emmerson Mnangagwa useze wavuma ukuba ilizwe liphakathi kwesimo sengozi, istate of national disaster, ebangelwa yindlala, okudale ukuthi afake isicelo soncedo kunhlanganiso lamanye amazwe ukuthi aphathise ngokudla okungafika imali engamadola angamabhiliyoni amabili, US$2 billion.
UMngangagwa wethule la mazwi ngoLwesihlanu esigodweni sikamongameli eState House phambi kwentathelizindaba.
UMnangagwa uthi ilizwe lizadinga ukudla okungafika isisindo esingama metric tonnes azikulungwane ezedlula ingxenye yesigidi, 680,000 ngoba ilizwe lizavuna amabele aysisindo esingama thani afika phose isigidi - 868,273. Wengeze esithi indlala yalonyaka iyesabeka. Akesizwe amazwi kaMnangagwa.
‘’Kuzulu weZimbabwe sithanda ukulazisa ngomumo wendlala ye Zimbabwe esilawo ngenxa yokuguquka komumo womkhathi sesifuna ukuba kube leState of disaster’’
UMnangagwa uthe kulabantu abafika izigidi ezimbili lengxenye - 2.7 million abazadinga ukudla lonyaka. Uqhubeke esithi akula muntu ozakufa ngendlala elizweni ngoba uhulumende wakhe ezimisele ukuba wonke umuntu athole okokudla.
“Sifuna ukuba wonke umuntu athole ukudla. Akula muntu weZimbabwe okumele afe ngendlala.’’
UMnangagwa ucele ukuba amazwe afana leSouth Africa angenele ngokuthengisela eleZimbabwe amabele. Uthe uhulumende wakhe uzasebenza lamankampani azimeleyo ukuba uzulu atholiswe ukudla. Inhlanganiso ezitshiyeneyo bezikhuthaza ukuba uMnangagwa athathe lelinyathelo ngoba uzulu ubevele eselamba kusukela umnnyaka odluleyo.
Isigodlo senhlanganiso yamazwe omhlaba eyeUnited Nations kwele Zimbabwe ithi izaphathisa ilizwe leli ekudingeni ukudla kwabalambayo.
Ithi kumele kukhangelwe njalo okungenziwa ukuze kwenqatshelwe indlala enkulu kangaka okunjengokulungisa indawo zokulima lokunye kusetshenziswa idlela ezikhaliphileyo ezokulwisana lokukhudumala komkhathi.
Ibike njalo ngoLwesithathu eHarare ukuba kulesikhwama semali esethulelwa eleZimbabwe eseCentral Emergency Response Fund esilemali efika izigidi ezinhlanu – US$5 million eyokwenqabela imikhuhlane etshiyeneyo. Okwamanje ithi izadinga imali yokuthengela abalambayo ukudla.
Kusenjalo, uChristine Mendes, umsekeli womqondisi wenhlanganiso yeWorld Food Program kwele Zimbabwe, uthi bazazama ngamandla wonke ukuba bencede eleZimbabwe ngokudla lokunye. Sixoxe njalo ngodaba lolu loMnu. Everson Ndlovu obona ngezehlakalo zendlala lokunye, ofundisa eNational University of Science and Technology othi eleZimbabwe kumele lilungise okubangela indlala elizweni leli iminyaka yonke.
Ingcwethi kwezomnotho esebenza eZimbabwe Economic Forum, uMnu. Liberty Ncube, uthi abantu abanengi bayakwamukela kahle okwethulwe nguMnangagwa.
"Lokhu okwenziwe ngumongameli kuyamukelekile kakhulu ngoba indla eselizweni inkulu kakhulu. Kuvele kufanele ukuba sivume ukuba ikhona ukuze wonke umuntu olendlala athole usizo.’’
Eyinye njalo ingcwethi kwezomnotho uMnu. Rejoice Ngwenya okunhlanganiso yeCommon Market for Liberal Solutions, uthi kungaba nzima ukudingela eleZimbabwe imali efika amabhiliyoni amabili amadollar – US$2 billion eyokuthengela abalambayo ukudla.
Lokhu kusekelwe ngeyinye njalo ingcwethi kwezenotho esebenza lenhlanganiso yabakhubazekileyo eyeDisability Centre, uMnu. Masimba Kuchera, othi kulungile ukuba ilizwe lenze lokhu kodwa esithi eleZimbabwe seliphuzile ukubikela umhlaba ukuthi libhekane lendlala eyesabekayo.
‘’Kufuze sizibuze ukuba asiphuzanga na ukwenza lokhu. Mhlawumbe bekumele lokhu kwenziwe umnyaka uqala ukuze sithole usizo ngoba kulenhlanganiso ezinengi ezimelele lokhu ukuze kutholakale ukudla"
Inhlanganiso yeWorld Food Program ngoNhlolanja lonyaka yabika ukuba indlala yalonyaka inkulu kakhulu okwedlula indlala zonke kuminyaka engamatshumi amane - 40 asanda kwedlula.
Ugatsha luka hulumende wakwele Melika olweUnited States Agency of International Development lwabika ukuba abantu abafika izigidi ezimbili lamatshumi amabili - 20 million bazahlaselwa yindlala eningizimu yezwekazi leAfrica lonyaka.
EleZambia laba ngelakuqala ukwethula isimo se-national disaster ngoNhlolanja eleMalawi lalandela kunyanga esanda kwedlula.