Ummeli weMelika omutsha eZimbabwe uAmbassador Pamela Tremont ukhangelelwe ukuqala umsebenzi eHarare kunsukwana ezilandelayo ngemva kokufungiswa kwakhe yiziphathamandla zogatsha lweState Department eWashington DC ngoMvulo.
Uhulumende weMelika ubeseleminyaka emithathu engelammeli opheleleyo eZimbabwe ngenxa yokuphuza kwamalunga edale leCongress ukwamukela ukukhethwa kukaTremont nguMongameli Joe Biden.
UAmbassador Tremont uqala umsebenzi nje ngesikhathi ubudlelwano phakathi kweMelika leZimbabwe buqhubeka busiya nganxele.
UBiden wethese uMongameli Emmerson Mnangagwa labanye bakhe izijeziso zenotho ezintsha kunyanga ezisanda kwedlula ngoba esithi baqhubeka besephula amalungelo oluntu njalo bentshontsha inotho yelizwe.
Ohlaziya ezombusazwe njalo eyingcwethi kwezokwethulwa kwemibiko uMnu Mthulisi Mathuthu utshele iStudio 7 ukuthi ngaphandle kokuthi uhulumende weZimbabwe ahloniphe amalungelo oluntu, kaboni eleMelika liguqula indlela elidlelana layo leleZimbabwe.
Your browser doesn’t support HTML5
Udaba Lommeli weMelika Omutsha eZimbabwe