UMnu. Antony Blinken, ophethe uhlangothi lukahulumende wakwele Melika olubona ngokudlelana lamanye amazwe, uthi eleMelika lizasekela eleUkraine lingahlaselwa ngele Russia, elingafuni ukuba ilizwe leli lingene kumanyano wezwekazi leEurope oweNorth Atlantic Treaty Organization.
UBlinken, okhulume ngodaba lolu lentathelizindaba yomsakazo weVoice of America, uthi akumelanga eleRussia lihlasele eleUkraine.
Uthi eleMelika lamanye amazwe azajezisa eleRussia lingahlasela eleUkraine.
UMkhokheli wakwele Russia, uMnu. Vladmir Putin, uthi ilizwe lakhe kalifuni kuhlasela eleUkraine. Uthi abakwenzayo kuyinhlalayenza. Kodwa abacubungula ezombusazwe bathi kusobala ukuba eleRussia lifuna ukuhlasela eleUkraine.
UMfundisi Raphael Mthombeni, ohlala kwele Melika, uthi kuyethusa okwenziwa ngele Russia.
UMnu. Busani Mbuso Ntini, laye ohlala kwele Melika, othi eleRussia kukhanya lidelela eleMelika.
UBlinken ukhangelelwe ukuba uzakwenza umhlangano oqakathekileyo kusasa loMnu. Sergey Lavrov, obona ngokwethulwa kwemibiko kwele Russia. EleRussia selifake ibutho lalo emgceleni welizwe leUkraine.
Your browser doesn’t support HTML5
Udaba Esilethulelwe NguGibbs Dube