Umhlangano wamazwe omhlaba wokuhlaziya isimo samalungelo oluntu emhlabeni jikelele, owe-57th United Nations Human Rights Council uqalile ngoMvulo eGeneva, kweleSwitzerland, umkhokheli walolugatsha uMnu Volker Turk ekhuthaza ohulumende bamazwe ukuthi balondoloze amalungelo kazulu.
Inkuthazo le iza ngesikhathi uhulumene waseZimbabwe esolwa ngabantu abanengi besithi uhlukuluza uzulu mahlayana ngokubopha abalwela amalungelo oluntu kanye labamabandla aphikisayo.
Sikhuluma nje kulamalunga ebandla leCCC elikhokhelwa nguMnu Jameson Timba abanengi abalokhe bevalelwe ngemva kwenyanga ezimbili bebotshiwe ngecala lokwenza umhlangano bengelamvumo yamapholisa.
Abanye babo bakhululwe ngeviki ephelileyo.
I-United Nations Human Rights Council ngokwayo isike yakusola ukubotshwa kukaTimba labanye bakhe njalo yakhuthaza uhulumende ukuthi abakhulule.
Igqwetha uMnu Pardon Tapfumaneyi utshele umsakazo weStudio 7 ukuthi kuqakathekile ukuba ohulumende, abagoqela oweZimbabwe balondoloze amalungelo oluntu.
Sehlulekile ukukhuluma lomphathintambo wezemithetho uMnu Ziyambi Ziyambi, onguye ovame ukumela uhulumende emhlanganweni lo.
Kodwa uhlezi ekulandula ukuthi uhulumende kaMongameli Emmerson Mnangagwa wephula amalungelo.