Umkhokheli wesonto yamaRoma, uPapa Francis, ufike eMelika ngoLwesibili wamukelwa nguMongameli Obama kuhambo lwakhe lwakuqala kuleli lizwe.
NgoLwesine ukhangelelwe ukukhuluma phambi kwamalunga edale leCongress.
Lanxa kungazakali ukuthi uPapa uzakhuluma ngani, kunakanelwa ukuthi ulakho ukukhuthaza iMelika ukuthi ikhokhele emizameni yokuqeda ubumpofu emhlabeni jikelele kanye lokuvikela umkhathi.
Ekhuluma ekweleCuba ngeSonto, uPapa ukhuthaze abasakhulayo emahlabeni jikelele ukuthi besebenze kanzima befeze amaphupho abo.
Wengeze wathi abasakhulayo yibo insika yomhlaba, ngalokho kumele baqakathekiswe njalo labo baziqakathekise.
Umbiko wakhe wamukelwe ngenjabulo ngabasakhulayo, abagoqela uMnu Thandazani Nkomo, ongumzalwane weRoma.
"Kulezinto ezinengi abasakhulayo abangazifunda embikweni kaPapa," kutsho uNkomo.
"Bengafunda ukuziphatha, ukuzithoba, bazazi ukuthi bayikusasa. Nxa uzitsho wena ukuthi uyikusasa yendawo kuyabe kusitsho ukuthi kumele uziphathe."
Your browser doesn’t support HTML5
Ingxoxo loMnu Thandazani Nkomo