UMongameli Robert Mugabe uphosa watshayeka phansi ngesiphundu ngoLwesine emhlanganweni ojonge ukuqinisa ubudlelwano phakathi kweIndia lamazwe ezwekazi le Africa.
UMugabe ubezama ukuqansa okuyisitezi okuncane efuna ukuyabingelela omunye wakhe umkhokheli wele India uMnu Narendra Modi, kodwa wehluleka wakhubeka waphosa wagenquka.
Uncedwe nguMnu Modi lamanye amadoda amabili ambambileyo. Uthe esesuka njalo esitejini lesi abathathu laba bambamba bemqinisa ukuze engawi.
UMugabe ube yinhlekisa enkulu emhlabeni jikelele eze awe egcekeni leHarare International Airport ngoNhlolanja.
NgoLwesine uMongameli Mugabe, yena oseleminyaka yokuzalwa engamatshumi ayisitshiya galolunye lanye (91), ubekhanya ediniwe njalo engelamandla.
Ingcwethi kwezombusazwe uDr Nkululeko Sibanda uthi lokhu kuveza sobala ukuthi uMugabe seluphele, ngakho sokumele atshiye intambo zombuso.
"Udaba lolu lusitshengisa ukuthi uMugabe labantu abamkhangelayo bayehluleka ukuvuma ukuthi umuntu uyafika esibangeni sokuthi hayi, lokhu engakwenza, lokhu angeke aba esakwenza," kutsho uSibanda.
Your browser doesn’t support HTML5
Ingxoxo loMnu Nkululeko Sibanda