Owayengumdlali wevolleyball uNtombikayise Khumalo ukhala ngokuthi lumdlalo awuselayo indumela owawulayo ngesikhathi bona besadlala.
UNtombikayise Khumalo uqale ukudlala umdlalo weVolleyball esesikolo seGreenfield Primary School eBellevue koBulawayo. Uqhubekele phambili ngokudlala lumdlalo esefunda esikolo seUsher.
“Ngadlala eUsher kusukela ngomnyaka ka1986 kwaze kwaba ngu1989 lapho engakhethwa khona ukuba kuqembu elimela idolobho lakoBulawayo. Sahamba sayadlala edolobheni leHarare njalo sasiqeqetshwa nguVulindlela Moyo kanye loRaeburn Ndebele. Ngemva kwalokho ngakhethwa ukuba yingxenye yeqembu lesizwe kodwa angisenelisanga ukuhamba labanye phandle kwelizwe ngoba ngangingela ncwadi zokuhambisa.”
UMaKhumalo uthi kwakungekho lula ukuyancintisana lezinye izigaba ekuqaleni.
“Ngangikaze vele ngihambe eHarare, kwakungokokuqala ukuya eHarare. Kwakunzima njalo kwakudlalwa sibili njalo. Ngicabanga ukuthi ngathi ngiqala ngawisa amabhola ami wonke ayisithupha.”
Ntombikayise Khumalo
UMaKhumalo uthe esesuke esikolo seUsher wayadlalela iqembu leHighlanders Volleyball Club njalo uthi ngalezonsuku bekuncintiswana kuze kube kuncane indawo.
“Iqiniso yikuba angizake ngizwe kukhulunywa ngemidlalo yevolleyball edlalwa edolobheni. Thina ngoLwesihlanu, ngoMgqibelo kanye langeSonto sasidlala kusukela ekuseni kuze kube ntambama. Kwesinye isikhathi sasidlala eBCD kuze kube phakathi kobusuku.”
Uqhubekele phambili uMaKhumalo esithi ulesifiso esokuba ngabe umdlalo wevolleyball uyavuselelwa kufane lakudala.
“Lanamhla lokhu ngolikhu ngikhona kwezemidlalo loba nje sengisemdlalweni kakhilikithi ngoba umdlalo wevolleyball wasuka wasusifa. Sazama ukuba siwuvuselele kodwa kwehlula ngenxa yokuswelakala kwemali. Ngiyafisa kakhulu ukuba ngabe uyavuka kufane lakudala thina sisadlala.
UMaKhumalo usebenza eZimbabwe Youth Cricket Academy yona eyayisaziwa ngegama elithi Heath Streak Cricket Academy.