Unobhala jikelele womanyano wamazwe omhlaba oweUnited Nations (UN) uMnu Antonio Guterres uthi uphatheke kabi kakhulu ngendlala ehlasele amazwe amanengi emhlubulweni wezansi yeAfrica agoqela eleZimbabwe.
Isikhulumeli sikaGuterres uMnu Stephane wethule amazwi la izolo ngemva kokuba uMongameli Emmerson Mnangagwa ehlele indlala njengesimo esiphuthumayo elandela eleZambia leleMalawi, wona alezigidi lezigidi zabantu ezidinga usizo lokudla.
EZimbabwe uhulumende uthi abantu abadinga ukudla bayizigidi phose ezintathu, 2.7 million, kodwa inhlanganiso yeFood and Agriculture Organization ithi inani leli likuzigidi ezintathu ezilengxenye, 3.5 million.
Emhlabeni jikelele iUN ithi abantu abahlaselwe yindlala bedlula izigidi ezingamakhulu amathathu, 309 million.
Ngeviki edluleyo uMongameli Mnangagwa ucele imali yokuthengela abantu abalambayo ukudla engena kumabhiliyoni eMelika amabili, US$2 billion.
Ihofisi yeUN ebona ngokuphandela abalambayo eyeCoordination of Humanitarian Affairs ithi yesabela njalo ukuthi ukusilela kwamanzi ahlanzekileyo eZimbabwe kulakho ukuphehla imikhuhlane efana lowe-cholera.
Ithi njalo iUN izimisele ukuhlenga bonke abalambayo ingathola imali eyaneleyo futhi ithi maduze nje izakwethula isicelo semali yokudingela uzulu weZimbabwe ukudla.
Umgcinisihlalo wenhlanganiso yeHarare Residents Trust uMnu Albert Mazula utshele iStudio 7 ukuthi lanxa isimo se-cholera sesinganeno eHarare, umkhuhlane lo ungaphenduka usabalale yiloba nini ngoba udubo lwamanzi lusakhona.
Your browser doesn’t support HTML5
Ingxoxo loMnu Albert Mazula