Unobhala jikelele wenhlanganiso yeCommonwealth uthi eleZimbabwe selizame ngamandla wonke ukulungisa okunengi okufunakalayo okungenza ukuba libuyele kumanyano lo kulandela ukususwa kuwo ngomnyaka ka2003 ngowayengumongameli umuyi uRobert Mugabe.
Umbiko owethulwe nguNkosikazi Patricia Scotland egwalweni olujulileyo olulotshwe liphephandaba leGlobe and Mail ukubeke sobala ukuba loba sokulenguquko ekhanyayo eZimbabwe engenza ukuthi ilizwe leli libuyele kunhlanganiso le, kukhona okunye okuzamele kwenziwe nguhulumende kamongameli Emmerson Mnangagwa okuzasuthisa amazwe wonke alakho ukwamukela eleZimbabwe ngenjabulo.
EleZimbabwe elangena kumanyano lo ngomnyaka ka1980, lamiswa okomnyaka ngo2002 ukuba yingxenye yawo kulandela ukwephulwa kwezinye iziqondiso zeCommonwealth ezimayelana lokuqhuba ukhetho olukhululekileyo.
Kwathi-ke ngomnyaka ka2003, umuyi uMugabe wasusa ilizwe leli kunhlanganiso le esebone ukuba kayisoze ibuyiselwe ngamazwe ayekhonona ngesimo esibi esezombusazwe kulelolizwe.
Kulandela ukugenqulwa kuka Mugabe, umongameli Mnangagwa usezame ngendlela zonke ukuthi eleZimbabawe libuyele kumanyano lo. Ngakho-ke uNkosikazi Scotland ukubona kukahle ukuthi eleZimbabwe libeyingxenye yeCommonwealth.
Kodwa lokhu kusolwa zinhlanganiso ezizimeleyo ezithi eleZimbabwe lokhe lisephula ilungelo loluntu njalo lisehluleka ukuqhuba ukhetho olukhululekileyo. Ingcwethi kwezombusazwe esekolitshini leAfrica University, uMnu. Nkosikhona Sibindi, uthi kuyamethusa okulotshwe nguScotland.
"Kuyamangalisa kakhulu ukuba iCommonwealth ithi konke sokukahle eZimbabwe khona kusobala ukuba akula osekuguqukile selokhe uMnangagwa wathatha intambo zombuso. Kuyamangalisa kakhulu lokhu,’’ kutsho uSibindi.
Banengi abachothoza okwethulwe nguNkosikazi Scotland. Omunye wabo nguMnu. Regan Dube, owafunda phansi kohlelo lweCommonwealth Scholarship.
"Akusiqiniso ukuba okwenzakala kwele Zimbabwe kuveza intando kazulu, iziqondiso ze Commonwealth ezikhulunywa kugwalo lolu azihambelani lalokho okufunwa nguzulu we Zimbabwe. Sithemba ukuba bazathola imbiko ebantwini abakwaziyo okwenzakala kuleli,’’ kutsho uDube.
Lokhu kusekelwa nguMnu. Nobert Mdlongwa, ingcwethi kwezombusazwe esebenzelana lenhlanganiso yeSouthern African Human Rights Forum, othi kunengi okumele kwenziwe ngeleZimbabwe ukuze libuyele kumanyano weCommonwealth.
Imizamo yokuthola imbono kahulumende ngaloludaba yehlule ngoba umphathintambo wohlangothi olubona ngobudlelwano lamanye amazwe, uSikhwicamfundo Amon Murwira, ebengaphenduli umakhalekhukhwini wakhe. Kodwa osekela ibandla leZANU PF owenza izifundo zePhD kundaba zakwamanyane amazwe ezeInternational Relations, uMnu. Dennis Ncube, uthi kusobala ukuba ibandla leZANU PF selenelise ukuguqula okunengi selokhe kwagenqulwa uMugabe ngo2017.
'' Kuliqiniso ukuba sekulenguquko kuleli selokhe uMongameli Mnangagwa wathatha intambo zombuso. Kodwa sekungcono elizweni ikakhulu kwezombusazwe''
Ngomnyaka ka 2022 iqula leCommonwealth elalikhokhelwa ngumsekeli kanobhala walo, uMnu Luis Franceschi, lethekelela kweleZimbabwe ukuyahlolisisa ukuba ilizwe leli lalilandela kumbe hatshi iziqondiso zalumanyamo ukuze lamukeleke. Ngesikhathi eleZimbabwe lilobela ukuba livunyelwe ukungena kulumanyano, laziswa ukuba lilakho ukungena kunhlanganiso le nxa lingalandela iziqondiso zokuhlonitshwa kwelungelo loluntu.
Amazwe aweCommonwealth kumele aphe impendulo yawo kumaviki alandeyo mhlaka 26 Lwezi ukuze batsho ukuba eleZimbabwe lamukelwe loba hatshi.
Nxa engekho amazwe azakwala ukuba eleZimbabwe lamukelwe kumanyano lo selizangena kuhlandla lokucina lapho elizaloba incwadi yokucina ukuba lamukelwe kuCommonweath.
EleZimbabwe lilakho ukuthola inzuzo efana lokuthuthukisa umnotho uma lingavunyelwa ukubuyela kumanyano weCommonwealth ngoba lizakuba lamathuba okusebenzelana lamazwe afika phose amatshumi ayisithupha – 56.
SEE ALSO:
Udaba Esilwwethulelwe NguMlondolozi Ndlovu