Umka mongameli, unkosikazi Grace Mugabe ubese Kezi esigabeni se Matabaleland South ngoLwesine, engenisa eminye yemihlangano yakhe ayenza elizweni lonke, lapho athuke khona umkhokheli webandla leMDC-T uMnu. Morgan Tsvangirai esithi kalancedo ngoba engazibambi endabeni zabesifazane.
Umkhokheli welinye lamacele eMovement For Democratic Change -MDC-T, umnumzana Morgan Tsvangirai
UNkosikazi Mugabe uncome umuyi owake waba ngumsekeli kamongameli njalo wakhokhela ibandla lezombusazwe ele PF Zapu, uDr. Joshua Mqabuko Nkomo, odabuka kulumango njengeqhawe lamaqhawe njalo wabonga uzulu walesi sigaba ngokuvotela ibandla leZanu PF ngoba izihlalo zonke ze Matabaleland South zaya kulelibandla.
"Siyajabula namhla ngoba siyazibusa ngenxa yabantu abafana lo Nkomo, oMohadi, oMoyo labanye elithi namhla banothile kodwa bona bezihalela ngemva kokuletha uzibuse," kutsho unkosikazi Mugabe.
Owayengumkhokheli wePF Zapu uDr Joshua Mqabuko Nkomo
Wengezelele esithi abelungu babefuna ukuthatha njalo ilizwe ngokusebenzisa uMnu. Tsvangirai lebandla lakhe kodwa wathi abantu sebezibonela ngabawabo ukuthi uMonameli Mugabe nguye okhaliphileyo.
"Labona abanengi besiya kubandla le MDC besithi lizaletha inqubelaphambili kodwa ngokuya kwesikathi lazibonela ukuthi babeqanjelwa amanga," kutsho uNkosikazi Mugabe.
Wengezelele esithi uhulumende wasungula uhlelo lwe ZimAsset ngoba yilo oluzahlenga uzlu ebunzimeni. Wonke umuntu elizweni, kutsho uNkosikazi Mugabe, ufana lesotsha elilwela ukuphumelela yikho wonke umuntu emele ahlale esuthi ngokudla okulohlonzi.
UNkosikazi Mugabe uthe ngenxa yokoma kwesigaba se Matabeleland South uhulumende wabona kukuhle ukuthi aphathise uzulu ngokusungula inhlelo zokuthelelezela phansi kogatsha lwe ARDA.
Umkamongameli unkosikazi Grace Mugabe
Wengezelele esithi kulenkampani yakwele Italy ethi ifuna ukuthi izophathis uzulu walesisigaba ngokufuya amacimbi azakuba ekhulu siphi isikhathi hatshi ukuwamelela ngesikhathi sebusika nje kuphela.
"Amatalakita avela emazweni athi China, Brazil le Beralus sizawapha abalengadi zokuthelelezela abanye bazowathola ngezinye insuku," kutsho uNkosikazi Mugabe. Wabe amatalakita ayisithupha.
Okunye ukuphiwe abantu kubalisa itshukela, isepha, amafutha okupheka, imvundiso, inhlanyelo lempahla egqokwa ngabadlala inguqu labadlala ibhola lamantombazana.
UChris Gande weStudio Seven uxoxe lesiphathamandla sebandla le MDC-T esigabeni se Matabeleland South, uMnu. Thandeko Zinti Mkandla othi amanye amabhasi awe ZUPCO kade ethunywe ukuthwala uzulu abonakale esiya emhlanganweni lo elabantu abalutshwana.
"Ngokuzwa kwethu bebkhonanyana abantu abangafika 5 000 kodwa ke singalibali ukuthi bebevela kusigaba sonke seMat South okutsho ukuthi bebelihleka nje kuphela," kutsho uZinti Mkandla.
UZinti Mkandla uthe kukhanya imihlangano enziwa nguNkosikazi Mugabe ilezinto ezithile ezijongiweyo.
"Okwakuqala umdala usekhulile usemadolonzima usefuna isithunywa esizakhuluma lokho okufiswa nguye, okuthandwa nguye ngoba nanku ebandleni lakhe kusuka uthuli kasathembi abanye bakhe ngobana sebebizana ngele gamatox babizane ngele weavil babizane ngele G40," kutsho uZinti Mkandla.
Your browser doesn’t support HTML5
Ingxoxo loMnu. Thandeko Zinti Mkandla