Amacele eMDC sesole uNkosikazi Grace Mugabe esithi uphehla udlakela ngamazwi okuthi abasekeli bawo kabamelanga balugxobe eMashonaland Central.
"Yingcekeza le ekhulunywa nguNkosikazi Mugabe," kutsho isikhulumeli seMDC ekhokhelwa nguMnu Welshman Ncube, uMnu Kurauwone Chihwayi, embikweni awethule ngoLwesine.
"Silenhlelo esizenzayo thina njengebandla eMashonaland Central. Ngalokho, asisoze sekele ukuya kulesisigaba ngenxa yokwethuselwa nguye," uqhubeke etsho uChihwai.
Ekhuluma emhlanganweni awenze eMashonaland Central ngoLwesithathu uNkosikazi Mugabe uthe le yindawo yeZanu PF kuphela.
AbeMDC bachothoze njalo uNkosikazi Mugabe esithi izinto ahamba ezabela abasekeli beZanu PF yindlela yokuthenga uzulu ukuthi avotele ibandla lakhe.
"Lihlazo ukuthi uNkosikazi Mugabe asebenzise izinto zikahulumende ukudinga usekelo. Amathalakitha awapha abantu lama-helicopter ahamba ngawo, yizinto zikahulumende," kutsho isikhulumeli seMDC-T UMnu Obert Gutu.
Kodwa ilunga leZanu PF uMnu Gadzira Chirumanzu ukulandule lokhu esithi izinto lezi ngezebandla lakhe hatshi uhulumende.
"Lingabokhuluma into elingazaziyo. Izinto lezi zathengwa yiZanu PF, ayisizo zikahulumende," kutsho uChirumanzu.
IMDC ikhala njalo ngabaphathintambo bakahulumende abekele ukuyaphendula imibuzo edale lephalamende ngoLwesithathu ngoba bebesemhlanganweni kaNkosikazi Mugabe.
Kodwa ummeli wePhelandaba-Mpopoma edale lephalamende njalo elilunga leZanu PF uMnu Joseph Tshuma uthi ukungabikhona kwabaphathintambo laba akuphazamisanga lutho.
"Umsebenzi wephalamende uhambe kuhle, akuzange kube lenkinga ngoba imibuzo ebikhona iphendulwe ngumsekeli kaMongameli uMnu Emmerson Mnangagwa," kutsho uTshuma.
Your browser doesn’t support HTML5
Ingxoxo loMnu Zenzele Ndebele loMnu Joseph Tshuma