UNkosikazi Joice Mujuru unqotshiwe kukhetho lokudinga amalunga edale le Central Committee esigabeni se Mashonaland Central. Lokhu kulandela ukunqotshwa kwenkokheli enengi ebicatshangelwa ukuthi iyamsekela ezigabeni zelizwe ezitshiyeneyo.
Abakhethiweyo bazamela ibandla emhlanganweni omkhulu webandla, owe Congress, lapho okuzakhethwa khona inkokheli yebandla ngeviki ezayo.
Abanye abanqotshiweyo babalisa abaMnu. Didymus Mutasa, Nicholas Goche loMnu. Francis Nhema. Kuthi enye njalo inkokheli eboniswe intuba igoqela uMnu. Sikhanyiso Ndlovu, uNkosikazi Angelina Masuku loMnu. Absalom Sikhosana labanye kade besaziwa ukuthi bayinsika ye Zanu PF.
Lokhu kutsho ukuthi abangakhethwanga laba kabasoze bakhethwe ukuya kudale elimqoka ele Politburo.
Enye inkokheli yeZanu PF efana loMujuru lo Goche ivinjwe ukusa ingwalo zokuncintisa ngabasekeli bebandla besithi kabayi kuvumela abantu abetheswa icala lokufuna ukubulala uMongameli Mugabe.
Abanye abasekeli beZanu PF babikwa bengene epulazini lika Goche besithi kasuke ngoba ungumthengisi.
Ukuhlaziya loludaba uChris Gande weStudio Seven uxoxe lengcwethi kwezombusazwe, uMnu. Brilliant Mhlanga othi abantu bengaziyengi becabangela ukuthi ibandla leZanu PF liyabhidlika.
Your browser doesn’t support HTML5
Ingxoxo loMnu. Brilliant Mhlanga