UMongameli Mugabe semise uhambo lwakhe lokuya emhlanganweni ohlaziya ezokuhanjiswa kwemibiko kweleSwitzerland kuliviki kulandela ukuncitshwa ivisa komkakhe uNkoskazi Grace Mugabae lezinye iziphathamandla zeZanu PF.
Iziphathamandla lezi zigoqela umphathintambo obona ngobudlelwano beZimbabwe lamanye amazwe uMnu Simbarashe Mumbengegwei, uMnu Nicholas Goche, isikhulumeli sikaMugabe uMnu George Charamba, umqondisi wamaCIO uMnu Happyton Bonyongwe loAssistant Commissioner Martin Kwainona.
Bonke laba bebemele bayengena umhlangano weInternational Telecommunications Union summit loMongameli Mugabe kweleSwitzerland.
Into emangalise abanengi yikuthi ngomnyaka ka2009 uMugabe lequla lakhe bavunyelwa ukungena emhlanganweni munye ngemva kokuphiwa ama visa yiSwitzerland.
Umanyano weEruropean Union wafakela uMugabe lamalunga eZanu PF izijeziso zenotho njalo abavunyelwa ukungena emazweni akulumanyano.
Kodwa eleSwitzerland alisilolunga leEU, njalo lawo amazwe akulumanyano kalamandla okuvimba uMugabe labanye bakhe ukungena kuwo nxa belanda imihlangano yeUnited Nations.
EleZimbabwe selithumele incwadi kuUnited Nations likhonona kakhulu ngenyathelo elithethwe yiSwitzerland, kutsho isikhulumeli sikaMugabe uMnu George Charamba.
Kunjalo nje, kulembiko ethi uMugabe usuke elizweni ngudlu elubhekise kweleSingapore ukuyakwelatshwa. Sehlulekile ukukhuluma labakubandla lakhe ngaloludaba.