Idale leHouse of Representatives likhangelelwe ukuba namuhla lizavotela ukuthi uMnu. Mark Meadows, owayesebenza ewofisini kowayengumongameli wakwele Melika, uMnu. Donald Trump, ahanjiswe emthethwandaba kulandela ukwala kwakhe ukwethula ubufakazi kwabakudale leCongress abacubungula ubudlwangudlwangu obenziwa ngabalandeli bakaTrump kubalwa amaElectoral Votes ngoZibandlela lonyaka.
Ikhomithi ehlolisisa okwenzakala eCapitol Hill mhlaka 6 lonyaka yethule umbiko lo izolo kusihlwa kulandela ukwala kuma Meadows ukukhuluma akwaziyo ngokwenziwa ngabalandeli baka Trump abavimba okwesikhathi eside ukuba kubalwe amaElectoral Votes.
UMongameli Joseph Biden wanqoba uTrump kukhetho olwenziwa ngoLwezi ngomnyaka ophelileyo kodwa uTrump uthi waqilwe libandla lama Democrats. Akulabufakazi obuveza lokhu.
UMeadows ngomunye owayekhangelelwe ukuba uzakwethula ubufakazi kwabahlolisisa udaba lolu.
IAssociated Press ibika ukuba omunye wabahlolisisa okwenzakala eCapitol Hill, uNkosikazi Lizzy Cheney, utshele abanye bakhe izolo kusihlwa ukuba kunengi okwenziwa nguMeadows, owayephethe isikhundla sokhangelane lenhlelo zonke eWhite House, obizwa ngeSilungu ngokuthi nguChief of Staff.
UCheney uthi kunengi okwenziwa nguMeadows ngesikhathi abalandeli baka Trump bezama ukuvimba ukubalwa kwama Electoral Votes.
UMeadows wanika idale leli akwethulela abantu abatshiyeneyo kuma emails lakumakhalekhukhwini ngesikhathi abalandeli baka Trump behlasela edale leCongress.
Kodwa walile ukunika ubufakazi ngokuyakhulumisana labahlolisisa udaba lolu esithi umthetho kawumvumeli. Amagqwetha akhe athi uMeadows akumelanga aveze akwenza mhlaka 6 ngoZibandlela lonyaka ngoba lokhu kulakho ukululaza iwofisi kamongameli. Bethule lokhu namuhla kuFox News.
Omunye osehanjiswe emthethwandaba ngenxa yokuthi walile ukunika ubufakazi edale leCongress nguMnu. Steve Bannon, owayengumcebisi kaTrump. Laye uthi umthetho uyamalisa ukuba anike ubufakazi lobanje kusobala ukuthi kakhulumi iqiniso.
Omunye njalo nguMnu. Jeffrey Clark, owayesebenza kuhlangothi lukahulumende olubona ngezemithetho. UClark kafisi ukuyakwethulela abahlolisisa udaba lolu akwenza uTrump ecela ukuba uhlangothi lolu luvimbe ukubalwa kwama Electoral Votes.
Olandela ezombusazwe, uMnu. Dan Moyo, uthi uClark lamanye bakhe bayakwazi abakwenza ngesikhathi abalandeli baka Trump bezama ukuvimba ukubalwa kwama Electoral Votes.
UMnu. Busani Mbuso Ntini ulombono ofanayo.
Banengi abadlelana loTrump abalandula ukuba balolwazi ngokwenzakala eCapitol Hill ngoZibandlela lonyaka. UTrump uthi uhulumende kaBiden ufuna kubotshwe bonke ababemsekela. Kodwa uBiden uthi la ngamanga aluhlaza tshoko.
Your browser doesn’t support HTML5
Abahlolisisa Okwenzakala eCongress NgoZibandlela Bafuna Kubotshwe uMark Meadows