Kulabanye abantu abathi uMongameli Emmerson Mnangagwa okhulume emhlanganweni weUnited Nations General Assembly kethulanga okufiswa nguzulu.
Kodwa-ke kulabanye abathi wethule amagama aveza ukuthi uzimisele ukuthuthukisa ilizwe leZimbabwe.
Lokhu ngokokuwala ukuthi uMnangagwa ethule umbiko wakhe emhlanganweni lo kulandela selokhu kwasuswa owayengumongameli uMnu. Robert Mugabe embusweni nyakenye.
Kunkulumo yakhe uphathe kakhulu ngokuqeda ubuyanga lendlala emazweni asathuthukayo lokuqeda ukubandlululwa kwamazwe ngamanye. Inkulumo yakhe iveze ukuthi yena uzibona ngempela enguye umongameli njalo ukuvunyelwa kwakhe ukukhuluma kutsho ukuthi amazwe omhlaba lawo asemamukele.
UNkosikazi Maureen Mthethwa uthi abantu beZimbabwe vele bakhathele ngohulumende lo ngoba kuvele abantu abaphansi yibo abadubekayo.
"ICorruption yiyo esibulele izinto ngoba singaze sithi siyabambana njani kodwa iSystem yiyo esifile."
UMnu. Morris Nkala uthi akula lutho olutsha olukhulunywe nguMnangagwa.
"Esikubonayo lapha vele ngingathi uMnangagwa udlala iRecord elidala ngakho ke singathi akula lutho olutsha alukhulumayo. Vele singakhangela amazwe asathuthukayo sizabona ukuthi afuna uncedo emazweni angaphandle. Inkokheli zidinga ukuba lombono welizwe."
Lokhu kusekelwe nguMnu. Derrick Dube othe kunzima ukukhuluma ngomuntu onjengoMnangagwa ngoba lokhe kulalabo abalokhu bephikisa umbuso wakhe.
Ingcwethi ezicubungula ezombusazwe zithi uMnangagwa usase lomango omkhulu wokuhamba ngemva kokhetho ngoba njalo kulalabo abalokhe besaphikisa umbuso wakhe lempumela yokhetho.
Uzulu ukhale ngokuthi uMongameli Mnangagwa waqala ngokuletha amacebo ensuku ezilikhulu kodwa lokhu akuzange kuphume kuhle ngoba akula abakubonayo kwaze kwafika kwadlula ukhetho.
Ukuvulela amazwe ukuthi azosebenzisana leZimbabwe kulakho ukufaka ilizwe ebunzimeni isisehlulwa yizikwelede.
Your browser doesn’t support HTML5
Udaba Esilethulelwe NguBathabile Masuku