Liviki kuhlelo Liphuma Lendaba Litshone Lendaba sihlaziya udaba oluhluzwe edale lephalamende amalunga avumelana ukuthi owesilisa ozakuya ecansini lentombazana eleminyaka engaphansi kwelitshumi lasithupha abotshwe.
Umthetho ubungahambelani lesisekelo sombuso obusuthi intombazana eleminyaka elitshumi lambili ubelalo ilungelo lokuya ecansini.
Lanxa isisekelo sombuso welizwe besikufaka sobala ukuthi umuntu oya ecansini lontambazana oleminyaka ephansi kwelitshumi lambili ulecala owesilisa ubesenelisa ukuthi engakhulumelana labazali bomntwana angasiwa emthethwandaba.
Kodwa kathesi sekuzakuba licala elikhulu nxa umuntu engaya ecansini lomntwana ongakenelisi elitshumi lasithupha.
Lokhu kutsho ukuthi loludaba seluzasiwa kukhomidi yezemithetho andubana uphenduke njalo edale leli uhlaziywe okokucina ungakayi kudale leSenate phambilini kokusayinwa nguMongameli Mugabe kube ngumthetho.
Ummeli wesigaba seMatabelaland South edale lephalamende, uNkosikazi Priscillah Misihairambwi Mushonga uthi ekuhlaziyweni kwalolu daba edale bebefuna ukuthi iminyaka le ikhwezwe kube licala ukuya ecansini lontombazana oleminyaka ephansi kwelitshumi lasitshiya galombili.
"Besifuna ukuthi umthetho ubophe abaya emacansini labantwana abaleminyaka engu 18 kodwa sicine sivuma yonale elitshumi lasithupha ngoba layo ingcono kulelitshumi lambili" kutsho uMisihayirambwi Mushonga.
Your browser doesn’t support HTML5
Ingxoxo loNkosikazi Priscilla Misihairambwi Mushonga