Ababalisi sebebaleke esikolo eGwanda South ngenxa katikoloshe odlwengula abesifazana. Kulezikolo zinye ezimbili ezivalwe lonyaka lanyakenye ngenxa yabondofa.
Kulamapolofita athi asemkhiphile undofa esikolo lesi loba ezinye izakhamizi zilokuthandabuza. Isikolo seMpaya Primary School sivalwe ngeviki ephelileyo ngemva kokuba ababalisi bebalekele undofa oxhwalileyo. NgoLwesithathu kuliviki amapolofita enkonzo yeJohane Masowe ahambe kulesisikolo ukuyakhupha undofa kodwa abanye abantu basele bethandabuza ngokukhitshwa kwalundofa.
Okwenzakale eMpaya Primary School
Kubikwa ukuba amapostoli la amkhiphile undofa lo eMkhalipe kuWard 20 obethwalise ababalisi abesifazana amagabha avuzayo.
Lundofa udale ukuthi ababalisi abahlanu bafulathele lesisikolo kumaviki amabili adlulileyo okwenze kwavalwa ngci isikolo lesi. Umgcinisihlalo wekhomithi yabazali besikolo seMpaya, uMnu. Tsepiso Moyo, uthi sesiside isikhathi bengalali ababalisi okudale ukuthi kudingwe amapolofita.
“Sihlangane lohlupho olungapheliyo kwakhanya ababalisi sebethwele nzima esikolo kungasahlaliseki kahle , sacina sihlahla phansi sidinga ukuthi kwenzakalani kwesiknye isikhathi kuvuke kuhazwe kumaBlack Board ,kungakho sicine sidinga abaporofethi ukuthi basincedise ngoba alabantwana bebengasayi lesikolo.”
Uthwwele undofa okhitshwe eMpaya Primary School
Lamazwi agcizelelwe ngukhansila kaWard 20 uMnu. Joram Ndlovu.
“Kulezinto ezikhona esikolo ezihlupha amateacher , amateacher lalapho abalala khona sebesesaba, kuthwa lapha ebusuku kuyabe kuhlatshelwa ingoma yesizwe ,inational anthem so yikho okubangele lokuthi amateacher abaleke esikolo, kuthwa kulenyoka ekhona lapha esikolo etshintshayo, ingatshintsha ibengumuntu yikho lapho eyabe sifuna abesifazane.”
NgoLwesithathu amapolofita ebandla leJohane Masowe amababili ethekelele isikolo lesi lapho afike akhipha izinto ezingaqedakaliyo ezibalisa inyawo zofudu lezenkakha ebezibotshelwe ngamalembu abomvu kwasekubotshwa ngamangqongqo.
Izakhamizi eMpaya Primary School
UNkosikazi Thando Mauba wenhlanganiso yababalisi eyeEducators Union of Zimbabwe uthi kuvamile ukuthi izikolo zivalwe kulumhlubulo ngenxa yabondofa kodwa waphinda wathi kukhona okunuka santungwana ngokukhitshwa kukandofa weMpaya.
“Ngicabanga ukuthi sokuyisehlakalo sesithathu kundawo yethu leyi , isehlakalalo esinjalo sike senzakala esikolo endaweni zeManama, leMatulungundu lapho okwakuthiwa kulabondofa ababehlukuluza ababalisi, nanku eMpaya sizwe sekukhulunywa ukuthi endaweni yenyoka ,undofa obezwakala ehamba besekukukhitshwe izintwana ezigqoke lokhu lalokhu,sekukhitshwa izinyawo zalokhu lalalokhu.”
Umhlangano owenziwe eMpaya Primary School
Ukhansila uNdlovu laye ufune ukuzwisisa ukuthi kambe kungaba ngundofa na lo okhitshiweyo.
“Ubaba lo uthe kulenyoka , inyoka leyana iyaphenduka kwesinye isikhathi ibengumuntu,bengicabanga ukuthi izinto lezi sizazibona ngamehlo, ngicela ukuchasiselwa ukuthi kungani singazibonanga.”
Omunye wamapolofita la, uMnu. Talent Moyo uthi umsebenzi wabo uqotho.
Amapolifita akhiphe undofa eMpaya Primary School
“Umuthi uyatshintsha uphakathi kwabantu, nxa esiyawuthatha kathathi kuyinyoka, uthatha kungumuthi ,uyenelisa ukumbona engumuntu esikolo khonapha kanti ngumuthi osebenza kubomama besikolo.”
Amapolofita la acelwe ukuhlawulwa ngamakhulu ayisithupha amadollar eMelika – US$600. Kasenelisanga ukuxoxa ngodaba lolu labaphathi bezikolo esabelweni lesi.
Izikolo ezibalisa iGwakwe kanye leKhozi eGwanda South ngezinye ezike zavalwa ngenxa yabondofa.
SEE ALSO:
Udaba Esilwethulelwe NguAlbert Ncube