Okhokhela umkhankaso wokuqoqa ukutshengisela abantu bekhonona ngenkohlakalo okumele kwenziwe eZimbabwe mhlaka 31 Ntulikazi, uMnu Jacob Ngarivhume uncitshiwe ithuba lokubhadalela isibambiso sebheyile ngu Mantshi Trynos Utahwashe ngoLwesine, wathi kaphenduke edale mhlaka 6 Ncwabakazi.
Intathelizindaba uHope Chin’ono udaba lwakhe luzaqhubeka luthethwa ngoLwesihlanu. UNgarivhume umiswe phambi kuka Mantshi esetheswa icala lokufuna ukugenqula uhulumende. Iqgwetha lakhe uMnu Moses Nkomo uchasise ngokuncitshwa kwakhe isibambiso se bheyile esithi akalacala.
“Sesiphume edale, uJacoba Ngarivhume uncitshwe isibheyile ngoba uhulumende wesaba ukuba nxa engaphiwa ibheyile kungaba lokutshengisela. Uhulumende uthi usetshotshozela abantu ukuba batshengisele besola inkohlakalo elizweni”
UNkomo uqhubeke ethi udaba luka Ngarivhume luzasiwa emthethwandaba we High Court ukuze ugenqule isinqumo esethulwe ngu Mantshi.
“Esizakwenza sizalusa phambili udaba lolu olumangalisa kangaka. Sizakuya emthethandaba we High Court masinya ukuthi isinqumo lesi sigenqulwe. Lokhu kubi hatshi nxa sisebenzisa umthetho kuphela kodwa nxa ukucabangisisa nje kayamangalisa”
UNgarivhume wetheswa leli cala ndawonye lentathelizindaba uHopewell Chin’ono bona bamiswe phambili kwaboMantshi abehlukeneyo.
UChingono umiswe phambili kukaMantshi uNgoni Nduna yena obengakafiki esibangeni sokupha isinqumo sokuthi uChin’ono aphiwe imvumo yokuhlawulela isibambiso sebheyeli na loba hatshi, esithi uzakutsho kusasa ngoba isikhathi besesidliwe ngumangoye ethi izisebenzi zedale zigijimele endlini ngenxa yomthetho ofakwe nguMongameli owukuba wonke umuntu abe sendlini ngehola lesithupha ntambana.