Umzukulu weNkosi uMzilikazi kaMatshobana uthi uyethusa umbiko owethulwe nguhulumende labanye abathi bahamba kwele Zambia bayadingisisa ingcwaba leNkosi uLobengula.
UMnu. Leo Zulukandaba Khumalo, odabuka emzini weNkosi uMzilikazi, uthi labo abahambe bayadinga ingcwaba lika Lobengula kabazange bebabuze ngalokhu njalo yinxwala ukuzwa umuntu ekhuluma ngalapho okwafihlwa khona iNkosi yesizwe sikaMthwakazi eyanyamalala kulandela impi enkulu labamhlophe ePupu esigabeni seLupane.
Uhulumende wanika uMnu. Phathisa Nyathi, olonda imbali yaMaNdebele, iziphathamandla zikahulumende kanye lehlekana lokuthiwa ngabako Khumalo ukuba beyedingisisa ngengcwaba leNkosi uLobengula esigabeni esiphansi kuka Mpezeni kwele Zambia.
Bathi batshelwa ngabanye abantu ukuba likuyiphi indawo ingcwaba likalobengula. Sehlulekile ukukhuluma loNyathi leziphathamandla lezi ngodaba lolu.
Uhulumende ubika ukuba ingcwaba leNkosi uLobengula lisentabeni lapho abangenelisanga ukuyafika khona.
UKhumalo uthi bakuzwe ebantwini ukuba "kulabantu abagangileyo abafuna ukuyabona amathambo eNkosi. bafuna ukuwenzani bangawabona?"
Uthi kabatshelwanga ngakho konke lokhu okwaziwa ngokuthi yinxwala kusiko lesizwe sikaMthwakazi.