Kuhlelo lwamasiko lenhlalakahle kazulu ngoLwesibili sixoxe loMnu. Nicholas Moyo umsekeli womqondisi wohlangothi lukahulumende olubona ngezamasiko.
Banengi abantu beZimbabwe abacabangelwa ukuthi bathumeza izithombe zabo ezingalazembatho ebulenjini be Internet lakuWhatsApp.
Sike saxoxa ngodaba lolu lapho esizwe ingcwethi zamasiko zisithi kuyazila ukuthi umuntu athumeze isithombe sakhe enqunu ebulenjini lobu.
UMoyo utshele iStudio 7 ukuthi akumelanga abantu batshengisane izitho zomzimba zangensitha ebulenjini lobu.
“Isintu sesihlaselwe yizinto lezi ezintsha ezisifikele sesibadala ngoba izolo lethu kade lingela iInternet. Izolo lethu belingela zonke lezizinto esezisebenza ngokuhambisa amagagasi owowukhuluma lokubukela. Ngakho nxa sibamba indaba le kuyamele siyibambe sikhangele lapho osokuxhwale khona lalapho esesisehlulwa khona yisikhathi.
“Esintwini bekulizilo ukwembula ebantwini. Ngakho-e nxa abantu sebeficakala kusocial platform kulizilo lokuzembula laku social platform ngoba lakho kutholakala abantu. Indlela isintu sethu ekade siphawulwe ngakho yikuthi kuvele akumelanga umuntu azembule, umuntu abenqunu, umuntu azitshengise bhununu ebantwini. Usebenzi wemacansini ngumsebenzi wensithe. Uvele ubunjelwe ukuthi wenziwe ensithe, ukholiswe ensithe.
Kodwa-ke uthi kunzima ukuthi uhulumende angenele kudaba lolu njengoba amalungelo kazulu ehlonitshwa yisisekelo sombuso selizwe leZimbabwe.